काठमाडौं – भृकुटी मण्डपस्थित खुला बजारका व्यापारीहरूको संस्था ‘काठमाडौं निम्न व्यापारी संघ’ले रसुवा बाढी पीडितको उद्धार र राहतका लागि १३ लाख ५१ हजार सहयोग गरेको छ ।

संघले समाज कल्याण परिषदका सदस्य सचिव चक्रबहादुर बूढालाई उक्त रकम बराबरको चेक हस्तान्तरण गरेको हो ।

संघका अध्यक्ष लक्ष्मीप्रसाद ओलीलगायतका कार्यसमिति पदाधिकारीहरू चेक हस्तान्तरणमा सहभागी भएका थिए ।

अध्यक्ष ओलीले भने, ‘देश विपदमा रहेका बेला सहयोग गर्नुपर्छ । यस दुखको घडीमा बाढी पीडित र प्रभावितको साथमा उभिन हामीले सकेको सहयोग गरेका हौं ।’

खुला बजारमा रहेका १३ सय ५१ वटै स्टलले एक–एक हजारका दरले सहयोग गर्दा उक्त रकम संकलन भएको उनले बताए ।

उनले भने, ‘हामी विगतमा पनि यस्ता विपदमा सहयोग गर्दै आएका थियौं । यस्तो बेला हामी राज्यको पक्षमा उभिएका हौं । पीडितले राहत र उद्धारबाट वञ्चित हुनुहुँदैन भन्ने हाम्रो उद्देश्य हो । मानवीयता हामीले यस्तै बेला देखाउने हो ।’