काठमाडौं– वैशाख १ गतेदेखि असार १६ गतेसम्मको अवधिमा  देशभर भएका विभिन्न विपद्का घटनामा परी १ सय २१ जनाको मृत्यु भएको छ । 

राष्ट्रिय विपद् जोखिम न्यूनीकरण तथा व्यवस्थापन प्राधिकरणको तथ्यांक अनुसार यस अवधिमा कुल २ हजार ५ सय ६५ वटा विपद्का घटनाहरू दर्ता भएका छन् । विपद्का घटनामा परी ७ सय २० जना घाइते भएका छन् भने ३ हजार ५ सय ५९ परिवार प्रभावित भएका छन् । सुखद पक्ष के छ भने यस अवधिमा भएका घटनाहरूमा कोही पनि बेपत्ता भएका छैनन् ।

प्राधिकरणको तथ्यांक अनुसार यस वर्ष सबैभन्दा बढी मानवीय क्षति सर्पदंश र लेक लाग्ने समस्याका कारण भएको छ । यो अवधिमा ३ सय ६० वटा सर्पदंशका घटनामा २३ जनाले ज्यान गुमाएका छन् भने ३ सय ३८ जना घाइते भएका छन् ।

लेक लागेका ५४ वटा घटनामा २१ जनाको मृत्यु भएको छ । भौगोलिक कठिनाइ र पूर्वतयारीको कमीका कारण यसमा मृत्युदर उच्च देखिएको हो । विपद्का घटना संख्याका आधारमा आगलागी सबैभन्दा ठूलो चुनौती बनेको छ । दुई महिनाको अवधिमा ८१२ स्थानमा आगलागी हुँदा १७ जनाको मृत्यु भएको छ भने ९८ जना घाइते भएका छन् । आगलागीबाट ८९१ परिवार प्रभावित भएका छन् ।

त्यसैगरी, १९५ वटा चट्याङका घटनामा परी १६ जनाको मृत्यु र ९२ जना घाइते भएका छन् । वन्यजन्तुको आक्रमणबाट १३ जना र तीव्र हावाहुरीका कारण १३ जनाको मृत्यु भएको छ भने हावाहुरीका कारण सबैभन्दा बढी १ हजार ३ सय ५० परिवार प्रभावित भएका छन् ।

मनसुन सुरु भएसँगै बाढी र पहिरोका घटनाहरू पनि बढ्न थालेका छन् । बाढीबाट ६ जना र पहिरोबाट ५ जनाको मृत्यु भइसकेको छ । भारी वर्षाका कारण ३ जना र डुङ्गा पल्टिँदा २ जनाले ज्यान गुमाएका छन् ।

 १ सय ८८ वटा वन डढेलोका घटनामा १ जना र हिउँ पहिरोमा परी १ जनाको मृत्यु भएको छ । प्राधिकरणले मनसुन र गर्मीयाममा हुने यस्ता विपद्का घटनाहरूबाट बच्न पूर्वतयारी र सतर्कता अपनाउन आग्रह गरेको छ ।