काठमाडौं– सरकारले आगामी चैत १९ गते संघीय संसद्को अधिवेशन बोलाउन राष्ट्रपतिसमक्ष सिफारिस गर्ने निर्णय गरेको छ ।

सिंहदरबारमा सोमबार बसेको मन्त्रिपरिषद् बैठकले चैत १९ गते अपरान्ह २ बजे सिंहदरबारमा बस्नेगरि संसद्को अधिवेशन आह्वान गर्न राष्ट्रपति रामचन्द्र पौडेलसमक्ष सिफारिस गर्ने निर्णय गरेको सरकारका प्रवक्ता एवं शिक्षामन्त्री सस्मित पोखरेलले जानकारी दिए ।

त्यस्तै बैठकले संविधान संशोधन वहस पत्र तयार गर्न प्रधानमन्त्रीका राजनीतिक सल्लाहकारको अध्यक्षतामा संसदमा प्रतिनिधित्व गर्ने राजनीतिक दलहरूका प्रतिनिधित्व रहने गरी एक कार्यदल गठन गर्ने निर्णय समेत गरेको उनले बताए । 

त्यस्तै शिक्षामन्त्री पोखरेलले एसइइको नजिता नआई कक्षा ११ का लागि पूर्व तयारी कोर्शहरुका लागि विद्यार्थीहरुलाई तानातान गर्ने प्रवृतिलाई अन्तय गर्न खोजिएको उल्लेख गरे । 

विश्वविद्यालय वा सो तहभन्दा माथिका हकमा भने कानून अनुसार चलेका संस्थाहरुले पूर्व तयारी कक्षा लिन सक्ने मन्त्री पोखरेलले बताए ।