काठमाडौं – गायक तथा संगीतकार टंक बुढाथोकीले ८ वर्षअघि झापाको सडकमा गीत गाइरहेको बालक अशोक दर्जीलाई संरक्षण दिएर ठूलो पर्दाको अभिनयसमेत गराए ।

८ वर्षको टंकको संरक्षणमा अशोकले विद्यालयको शिक्षा, गायक र बालनायकको परिचय पाए । टंककै नेतृत्वको अभिनायमा अशोकको परिवारले झापामा घर पायो । अशोक भाइरल बन्नुअघि उनको परिवार दयनीय छाप्रोमा बस्थ्यो ।

टंकको संरक्षणले अशोक र उनको परिवारले नयाँ जीवन पायो । तर, अहिले अशोक आफ्नै घर फर्किएका छन् ।

तीन महिना बितेपछि टंकले अशोक सल्लाहमै झापा फर्किएको जानकारी गराएका छन् । यो कुरा तीन महिनापछि मात्रै उनले किन सार्वजनिक गरे ? शंकाको विषय हो ।

फेरि आइतबार मात्रै अशोकको अभिनय रहने भनिएको फिल्म ‘पार्वती’को छायाङ्कनको समाचार बाहिरिएको थियो । त्यसको केही समयपछि मात्रै टंकले अशोक आफूसँग छुटिएर झापा पुगेको खुलाएका हुन् ।

अहिले फिल्म ‘मनबिनाको धन’को आर्थिक विवादले टंक र अशोकको सम्बन्धमा दरार आएको गसिप पनि उत्तिकै छ । यो गशिपलाई बढाव अर्को कुराले दिन्छ– ९ कक्षाको पढाइ बीचमै छाडेर अशोक झापा गराएका हुन् ।

अशोकले काठमाडौंबाट ट्रान्सफर लिएर कक्षा ९ को बोर्ड परीक्षा झापाकै स्कुलबाट दिएका हुन् । उनी त्यहीँको स्थानीय विद्यालयमा पढ्दैछन् ।

के भन्छन् अशोक ?

फिल्मको आर्थिक विवादका कारण आफू झापा आएको हल्ला अशोकले ठाडै अस्वीकार गरे ।

बाटोमा गाउँदै गरेका बालकलाई फिल्ममा अभिनयको अवसर दिने व्यक्तिसँग आर्थिक कुरा उठान नै नहुने उनले तर्क गरे ।

उनले भने, ‘मलाई टंक दादाले फिल्म खेलाइदिनु नै ठूलो कुरा हो । उहाँको कडा मिहिनेतले फिल्म खेल्न पाएँ। उहाँले सडकमा गीत गाउँदै गरेको मलाई आश्रय दिएर फिल्म खेल्ने बनाउनुभयो । मलाई दर्शकले ठूलो पर्दामा स्वीकार्नुहुन्छ कि हुँदैन भन्ने चिन्ता थियो । फिल्म राम्रो भयो । मलाई दर्शकले स्वीकार्नुभयो । मैले फिल्म खेल्नु भनेको टंक दाइको हार्डवर्ककै कारण हो ।’

आफू टंकले दिएको संस्कार व्यवहारमा लागू गर्न झापा फर्किएको उनले बताए ।

परिवारकको संरक्षण गर्ने सोचले झापा फर्किएको बताउँदै उनले थपे, ‘बुवा कमजोर हुन थाल्नुभयो । अब म घर जान्छु । भाइ बहिनीहरू र उहाँहरूको ख्याल राख्छु भन्ने सल्लाह टंक दाइसँग गरेँ । मेरो कुरा सुनेर टंक दादा पनि खुसी हुनुभयो । अहिले म बुवा–ममीलाई हेरिरहेको छु । कन्सर्ट गरिरहेको छु । टंक दाइले मलाई बनाउन खोजेको यही नै हो ।’

अहिले भाइबहिनी र परिवारको ख्याल गर्दै पढाइलाई अगाडि बढाउन पाएकामा आफूलाई खुसी रहेको अशोकले बताए

थपे, ‘अहिले म स्कुटरमा भाइ बहिनीलाई लिएर स्कुल जान्छु । उनीहरूलाई लिएर फर्कन्छु । फुर्सदमा गीत लेख्छु । बुवाआमा झन् खुसी हुनुभएको छ ।’

आफू भागेर र झगडा गरेर नभइ सहज वातावरणमा सल्लाह गरेर झापा फर्किएको उनले खबरहबमार्फत् दर्शकलाई सन्देश छाडेका छन् ।

नायिका नीता ढुंगानाको निर्देशनमा बन्ने फिल्म ‘पार्वती’मा अभिनय गर्न आफू काठमाडौंमा आउने पनि उनले बताए।