काबुल- पूर्वी अफगानिस्तानको नङ्गरहार प्रान्तमा विगतको युद्धबाट बाँकी रहेको विस्फोटक उपकरण पड्किँदा तीन बालबालिकाको मृत्यु भएको छ भने एक जना घाइते भएका छन् ।

प्रान्तीय सरकारी कार्यालयका अनुसार बाला खोग्यानी जिल्लामा मंगलबार बालबालिकाले खेल्ने क्रममा खेलौनाजस्तो वस्तु फेला पारेका थिए । उनीहरूले उक्त वस्तुसँग खेलिरहेका बेला विस्फोट हुँदा तीन बालबालिकाको घटनास्थलमै मृत्यु भएको हो ।

विस्फोटमा एक बालक घाइते भएको र उनको उपचार भइरहेको जनाइएको छ ।

चार दशकभन्दा लामो युद्ध र नागरिक द्वन्द्वबाट प्रभावित अफगानिस्तानमा जमिनमुनि रहेका विस्फोटक उपकरण र बारुदी सुरुङका कारण अझै पनि सर्वसाधारण जोखिममा रहेको बताइएको छ । अफगानिस्तान विश्वका बारुदी सुरुङ तथा अन्य विस्फोटक पदार्थबाट सबैभन्दा बढी प्रभावित मुलुकमध्ये एक मानिन्छ ।