काठमाडौं – रसुवामा आएको विनाशकारी बाढीमा परी ज्यान गुमाएकाहरूको पहिचानका लागि डीएनए नमुना परीक्षण सुरु गरिएको छ ।

भारतबाट नेपाल आएको फरेन्सिक विशेषज्ञ टोलीले आइतबार नेपाल प्रहरीको केन्द्रीय विधिविज्ञान प्रयोगशाला र त्रिभुवन विश्वविद्यालय शिक्षण अस्पतालका नेपाली विज्ञहरूसँग भेट गरी डीएनए नमुना विश्लेषणसम्बन्धी काम अघि बढाएको हो ।

भारतीय पक्षका अनुसार बाढीमा परी मृत्यु भएकाहरूको पहिचानमा सहयोग पुर्‍याउने उद्देश्यले नेपाली विज्ञहरूसँग समन्वय गरी फरेन्सिक परीक्षणको काम भइरहेको छ ।

भारतो विदेश मन्त्रालयले फरेन्सिक टोलीले नेपाल प्रहरीको केन्द्रीय विधिविज्ञान प्रयोगशाला र त्रिभुवन विश्वविद्यालय शिक्षण अस्पतालमा नेपाली विज्ञहरूसँग भेट गरेको जानकारी दिएको छ ।

रसुवाको भोटेकोसी र त्रिशूली नदीमा बुधबार आएको भीषण बाढी तथा पहिरोमा ठूलो मानवीय क्षति भएको छ । बाढीपछि विभिन्न स्थानबाट संकलन गरिएका शव तथा बेपत्ता व्यक्तिका परिवारबाट संकलित नमुनाको वैज्ञानिक परीक्षणमार्फत पहिचान गर्ने प्रयास भइरहेको छ ।

भारतले यसअघि नै उद्धार तथा राहत सामग्रीसहित फरेन्सिक विशेषज्ञ टोली र आवश्यक उपकरण नेपाल पठाएको थियो। भारतीय विदेश मन्त्रालयले नेपालमा जारी राहत तथा उद्धार प्रयासमा भारतको सहयोग निरन्तर रहने जनाएको छ । भारतीय फरेन्सिक टोलीको सहयोगले पहिचान हुन नसकेका शवको वैज्ञानिक विधिबाट पहिचान गर्न तथा आफन्तलाई शव बुझाउने प्रक्रिया सहज हुने अपेक्षा गरिएको छ।