काठमाडौं – कन्टेन्टको लोभले रसुवा बाढी प्रभावित क्षेत्रमा पुगेर स्थानीयलाई विभिन्न प्रश्न सोधी हैरान खेलाउने युट्युबरहरूको बिगबिगी बढेको छ ।

केहीले संवेदनशल दृश्यहरू पनि कैद गरेको पाइएको छ ।

जेन–जी अभियन्ता माजिद अन्सारीले यस्ता दृश्यहरू कैद र प्रशारण भएको पाइएपछि बाढी प्रभावित क्षेत्रमा पुगेरै भिडियो सन्देश जारी गरेका छन् । उनले एक किशोरीले ‘भिडियो नखिच्न आग्रह गर्दा गर्दा दृश्य कैद’को प्रसंग पनि सुनाएका छन् ।

उनले किशोरीलाई नदेखाइ उक्त दृश्यको भिडियो पनि राखेका छन् ।

विदेशबाट आएक पत्रकार र कन्टेन्ट क्रिएटरहरूबाट यस्तो घटना भएको उनको दाबी छ ।

त्यस्तै, युट्युबरले प्रश्न सोधेरै हैरान लगाएपछि एक महिलाले बाढी प्रभावित घरबाट बगरको दृश्य खिच्न सुझाएको भिडियो चर्चामा छ ।

उनले युट्युबरलाई भन्छिन्, ‘नौलो सिन छ आउनु के । खिचेर लैजानु न चर्चामा आउनसक्छ ।’

ती महिलालाई पछ्याउँदै युट्युबर बगर बाढीले प्रभावित बनेको घरको बार्दलीमा पुग्छन् ।

अनि महिलाले भन्छिन्, ‘यसरी खिचेका छैनन् के मान्छेले । यो नौलो भएपछि त चर्चामा आउँछ नि त । यहाँ (बार्दली)बाट निहुरिएर खिच्नुस् । यहाँ छुट्टै नौलो देखिनेछ के ।’