काठमाडौं– चर्चित गायक अमृत गुरुङले तराई–मधेशमा विकसित भइरहेको अवस्थालाई हल्का रूपमा नलिन सरकारलाई आग्रह गरेका छन्।

सामाजिक सञ्जालमार्फत धारणा सार्वजनिक गर्दै चर्चित ब्यान्ड नेपथ्यका प्रमुख गायक गुरुङले माओवादी द्वन्द्वकाल र मधेश आन्दोलनका समयमा समस्या व्यवस्थापनमा संलग्न नेता, प्रहरी, सेना तथा प्रशासकसँग छलफल गरी उनीहरूको अनुभवबाट सिक्न सरकारलाई सुझाव दिएका हुन्।

‘प्रिय सरकार र सरकारसँग नजिकका राजनीतिज्ञहरू, तराई–मधेशलाई हल्का रूपमा नलिनुस्,’ उनले लेखेका छन्, ‘माओवादी द्वन्द्वकाल र मधेश आन्दोलनका बेला समस्यासँग जुधेका नेता, प्रहरी, सेना र प्रशासकसँग छलफल गर्नुस्। उनीहरूको सल्लाह सुन्नुस्। २०–२५ वर्षअघिको घटनाक्रम अध्ययन गर्नुस्।’

गुरुङले आफूले त्यतिबेला भ्रमण गरेको मधेशको स्मरण गर्दै विगतजस्तै अवस्था दोहोरिन नहुने कामना पनि गरेका छन्। ‘त्यसबेला भ्रमण गरेको मधेशको सम्झना अझै छ। फेरि त्यस्तो अवस्था नहोस् भन्ने कामना छ,’ उनले भनेका छन्।