काठमाडौं- पूर्वराजा ज्ञानेन्द्र वीरविक्रम शाहदेवले सुनसरीमा भएको साम्प्रदायिक तनावप्रति दुःख व्यक्त गर्दै नेपालीबीचको आपसी सद्भाव, सहिष्णुता र सामाजिक एकता कायम राख्न सबैलाई आह्वान गरेका छन्।

निर्मल निवासबाट बिहीबार जारी गरेको सद्भाव सन्देशमा उनले नेपाल बहुजातीय, बहुभाषिक, बहुधार्मिक र बहुसांस्कृतिक विशेषतायुक्त मुलुक भएकाले यही विविधताले विश्वमा नेपालको पहिचान र सम्मान स्थापित गरेको उल्लेख गरेका छन्।

‘हामी नेपालीहरू नेपाल निर्माणको सुरुवातदेखि नै परस्पर मिलिजुली, हाँसीखुसी र एकअर्काप्रति माया–प्रेम गाँसेर बसेका जातजाति हौं,’ सन्देशमा भनिएको छ, ‘यही विशिष्ट धार्मिक, सांस्कृतिक र सामाजिक गुणका कारण विश्वमा हाम्रो सम्मान रहेको छ। यो नेपाली विशेषता र गौरवलाई गुम्न दिनु हुँदैन, यसमा कसैले पनि खलल पुर्‍याउनु हुँदैन।’

पूर्वराजा ज्ञानेन्द्रले केही दिनअघि सुनसरीका केही गाउँबस्तीमा भड्किएको आपसी द्वन्द्व र विवादका कारण जनधनको क्षति भएको तथा त्यसको प्रभाव कोशी क्षेत्र र तराईका विभिन्न स्थानसम्म फैलिएकोप्रति दुःख व्यक्त गरेका छन्।

नेपाल सामाजिक सद्भाव र समुदायबीचको मेलमिलापका लागि परिचित देश भएको उल्लेख गर्दै उनले यस्ता अवाञ्छित घटना मुलुकको मौलिक मूल्य र मान्यताविपरीत रहेको बताएका छन्।

सन्देशको उनले देशका जुनसुकै भूभागमा रहेका नेपालीहरूबीच एकता, मेलमिलाप र सद्भाव कायम राख्न आग्रह गर्दै भनेका छन्, ‘जुनसुकै भूभागमा रहे पनि हामी सबै नेपाली मिलौं। यही आजको आवश्यकता हो।’