काठमाडौं- कर्फ्यु आदेश जारी भएपछि पनि तनाव चुलिएका बेला सिरहाको गोलबजारमा प्रहरीले गोली चलाएको छ।

बजार क्षेत्रमा दुई समुदायबीच बढेको तनाव नरोकिने देखिएपछि प्रहरीले गोली चलाउँदा एकजना युवकको ज्यान गएको छ।

गोलबजारमा गोली लागेर ज्यान गुमाएका युवकको नाम गणेश यादव रहेको छ। उनको शव अहिले स्थानीय अस्पतालमा राखिएको छ।

प्रहरीले हानेको गोली लागेर अन्य केही व्यक्ति गम्भीर घाइते भएका छन् । केही प्रदर्शनकारी घाइते भएर सडकमा लडेको देख्न सकिन्छ।

सुनसरीको कप्तानगञ्जबाट आइतबार रातिदेखि फैलिएको तनाव मधेश प्रदेशतिर सर्दै गर्दा भौतिक क्षति पनि बढेको हो।

गोलबजारमा बिहीबार पार्किङमा राखिएका ११ वटा मोटरसाइकलमा आगजनी गरिएको छ । गोलबजार नगरपालिकाको दमकलबाट आगो नियन्त्रणमा लिएको छ। अहिले गोलबजारमा स्थानीय प्रशासनले कर्फ्यु आदेश जारी गरेको छ।

मधेश प्रदेशको राजधानी जनकपुरधाम क्षेत्रमा पनि दुई समुदायबीचको तनाव बढ्दै गएको छ। जिल्ला प्रशासन कार्यालयले जनकपुरधामसहित केही नगरपालिका क्षेत्रमा अहिले साढे ३ बजेदेखि कर्फ्यु आदेश जारी गरेको छ।