काठमाडौं– सरकारले आगामी ५ वर्षभित्र स्मार्ट वितरण प्रणालीबाट २४ घण्टा स्वच्छ पिउने पानी सुनिश्चित गराउने भएको छ । अर्थमन्त्री डा स्वर्णिम वाग्लेले आगामी आर्थिक वर्षको बजेट प्रस्तुत गर्दै सो बताएका हुन् ।

उनले आगामी ३ वर्षभित्र ६५ प्रतिशत र ५ वर्षभित्र शतप्रतिशत नागरिकलाई सुरक्षित र स्वस्थ खानेपानी उपलब्ध गराउने बताए । 

उनले भने, ‘खानेपानी आपूर्तिको गुणस्तर र शुल्क संरचना तथा सेवा दायित्व सुनिश्चित गर्न नियमन प्रणाली सुदृढ पारिनेछ । काठमाडौं उपत्यकामा दिगो खानेपानी सेवा सुनिश्चितताको लागि विद्यमान महसुल संरचनाको पूर्नसंरचना गरिनेछ ।’

काठमाडौं उपत्यका खानेपानी व्यवस्थापन बोर्ड, काठमाडौं उपत्यका खानेपानी लिमिटेड, खानेपानी आयोजना कार्यान्वयन निर्देशनालय र खानेपानी तथा सरसफाइ सेवा महसुल निर्धारण आयोगलाई गाभी एउटै संरचना बनाइने भएको छ ।