काठमाडौं – नवनियुक्त कानुन, न्याय तथा संसदीय मामिलामन्त्री सोबिता गौतमले न्याय क्षेत्रका उच्च पदाधिकारीहरूसँग छलफल गरेकी छन् ।

मन्त्री गौतमले प्रधानन्यायाधीश, सर्वोच्च अदालतका वरिष्ठतम् न्यायाधीश, न्याय परिषद्का सदस्यहरू, न्याय सेवा आयोगका सदस्यहरू तथा उच्च पदस्थ कर्मचारीहरूसँग भेटघाट तथा छलफल गरेकी हुन् ।

छलफलका क्रममा न्याय परिषद् र न्याय सेवा आयोगका कार्यप्रणाली तथा समन्वयका विषयमा विचारविमर्श भएको जनाइएको छ । साथै, परिषद् र आयोगका पदाधिकारी तथा कर्मचारीहरूले मन्त्री गौतमलाई न्याय परिषद् र न्याय सेवा आयोगको सदस्यका रूपमा स्वागत गरेका थिए ।

बैठकमा विशेषगरी न्याय परिषद्को कामकारबाहीलाई अझ सुदृढ, प्रभावकारी र व्यवस्थित बनाउने विषयमा केन्द्रित रहेर छलफल भएको मन्त्रालयले जनाएको छ।