काठमाडौँ – काठमाडौँ निर्वाचन क्षेत्र नं. ३ बाट प्रतिनिधि सभा सदस्यका उम्मेदवार रहेका कुलमान घिसिङले आफ्नो चुनावी खर्च विवरण सार्वजनिक गरेका छन्। निर्वाचन आयोगमा बुझाइएको विवरणअनुसार घिसिङले चुनाव अवधिभर जम्मा १४ लाख १० हजार ८० रुपैयाँ खर्च भएको उल्लेख गरेका छन्।

घिसिङले बुझाएको ‘निर्वाचन खर्चको विवरण’ अनुसूची (४१) अनुसार सबैभन्दा बढी खर्च प्रचारप्रसार सामग्री छपाइमा भएको देखिन्छ। नमुना मतपत्र, ब्यानर, पर्चा र प्रतिबद्धता पत्र छपाइका लागि ३ लाख ८० हजार रुपैयाँ खर्च भएको विवरणमा उल्लेख छ।

त्यसैगरी, सवारी साधन भाडामा १५ दिनका लागि ३ लाख २० हजार, ब्याची, टोपी र झन्डा छपाइमा ३ लाख १० हजार तथा घरदैलोका क्रममा खाना खर्चबापत २ लाख ७० हजार ८१ रुपैयाँ खर्च भएको देखाइएको छ।

घिसिङले कार्यालय कोठा भाडा र सञ्चालन खर्चबापत एक महिनाको १ लाख २० हजार र मनोनयन दर्ता शुल्क १० हजार रुपैयाँ बुझाएको विवरणमा उल्लेख छ।

प्रतिनिधि सभा सदस्य निर्वाचन ऐन, २०७४ को दफा ७२ बमोजिम उनले जिल्ला निर्वाचन कार्यालय काठमाडौँमा यो विवरण दर्ता गराएका हुन्। निर्वाचन आयोगले तोकेको आचारसंहिता र सीमाभित्रै रहेर खर्च विवरण पेस गरिएको घिसिङले बताएका छन्।