काठमाडौं- रसुवाको भोटेकोशी क्षेत्रमा आएको विनाशकारी बाढीबाट प्रभावित नेपाललाई चीनले राहत तथा उद्धार सामग्रीसहित सहयोग उपलब्ध गराउने भएको छ। चीनले नेपाललाई २० लाख अमेरिकी डलर नगद सहायता समेत दिने जनाएको छ।

चीनले पहिलो चरणमा दुईवटा सैन्य कार्गो विमानमार्फत बाढी तथा विपद् प्रभावितका लागि आवश्यक अत्यावश्यक राहत सामग्री नेपाल पठाउने तयारी गरेको छ। विमानमार्फत आपत्कालीन उद्धार तथा राहतमा प्रयोग हुने सामग्री काठमाडौं ल्याइनेछ।

यसैगरी, चीनले सुरुङ उद्धार तथा प्राविधिक कार्यमा विशेषज्ञता भएका दुई टोली समेत नेपाल पठाउने भएको छ। बाढीका कारण प्रभावित जलविद्युत आयोजनाका सुरुङ तथा भूमिगत संरचनामा फसेका व्यक्तिको खोज तथा उद्धारमा ती टोली परिचालन हुने अपेक्षा गरिएको छ।

चीनको सहयोग नेपालमा जारी खोज, उद्धार तथा राहत अभियानलाई थप प्रभावकारी बनाउन केन्द्रित रहेको बताइएको छ।

भोटेकोशी क्षेत्रमा आएको बाढीबाट ठूलो जनधनको क्षति भएको छ। बाढीका कारण विभिन्न जलविद्युत आयोजना, बस्ती तथा महत्वपूर्ण पूर्वाधारमा समेत क्षति पुगेको छ।