काठमाडौँ – पूर्वप्रधानमन्त्री डा. बाबुराम भट्टराई बिरामी परेपछि अस्पताल भर्ना भएका छन् । मङ्गलबार बेलुका अचानक तीव्र चक्कर आउने र वान्ता हुने समस्या देखिएपछि उनलाई धापासीस्थित ग्राण्डी अन्तर्राष्ट्रिय अस्पतालमा भर्ना गरिएको हो।

उनकी छोरी मानुषी यामी भट्टराईले सामाजिक सञ्जालमार्फत दिएको जानकारी अनुसार चिकित्सकरूले डा. भट्टराईमा ‘बेनिन प्याराक्सिजमल पोजिसनल भर्टिगो’ (बीपीपीभी) को लक्षण देखिएको पुष्टि गरेका छन्।

बीपीपीभी कानको भित्री भागमा आउने गडबडीका कारण टाउकोको स्थिति परिवर्तन हुँदा अचानक चक्कर आउने एक प्रकारको स्वास्थ्य समस्या हो।

डा. भट्टराईका अन्य सबै स्वास्थ्य परीक्षण रिपोर्ट सामान्य रहेको र अहिले उनको स्वास्थ्य अवस्था सुधारोन्मुख रहेको परिवारजनले जनाएका छन्।