काठमाडौँ – नेकपा (एमाले) का उपमहासचिव योगेश भट्टराईले सुनसरीमा घटेको पछिल्लो घटनालाई लिएर सरकारको कार्यशैलीमाथि गम्भीर प्रश्न उठाएका छन्। सामाजिक सञ्जाल फेसबुकमार्फत आफ्नो धारणा सार्वजनिक गर्दै उपमहासचिव भट्टराईले सुनसरी घटनाले वर्तमान सरकारको अयोग्यता र अक्षमतालाई पूर्ण रूपमा प्रष्ट पारेको दाबी गरेका हुन्।

उनले क्षेत्रमा सिर्जित तनावपूर्ण वातावरणप्रति चिन्ता व्यक्त गर्दै शान्ति र सद्भाव कायम गर्नका लागि सबै पक्षको सामूहिक पहल आवश्यक रहेको औँल्याएका छन्। सबै राजनीतिक दल र प्रबुद्ध नागरिक समाजले तत्काल अग्रसरता लिएर स्थानीय समुदायलाई विश्वासमा लिनुपर्नेमा उनले जोड दिएका छन्।

उपमहासचिव भट्टराईले सामाजिक सद्भाव बिग्रन नदिन र स्थिति सहज बनाउनका लागि स्थानीयस्तरमै पुगेर ठोस कदम चाल्नुपर्ने आवश्यकता औँल्याएका छन्।

उनले लेखेका छन् “सुनसरी घटनाले सरकारको अयोग्यता र अक्षमतालाई प्रष्ट पारेको छ । सबै राजनीति दल र प्रबुद्ध नागरिक समाजले अग्रसरता लिएर स्थानीय समुदायको बिश्वासमा शान्ति र सद्धभाव कामय गर्न ठोस कदम चाल्नु पर्दछ ।”