काठमाडौँ – नक्कली नोटलाई सक्कली भन्दै ठगी गरेको अभियोगमा प्रहरीले ६ जनालाई पक्राउ गरेको छ । काठमाडौँ उपत्यका अपराध अनुसन्धान कार्यालय टेकुबाट खटिएको टोलीले उनीहरूलाई आइतबार कीर्तिपुर नगरपालिका–६ पाण्डेछापबाट पक्राउ गरेको हो ।

पक्राउ पर्नेमा बारा बस्ने ३८ वर्षीय मिलनकुमार तामाङ, काठमाडौँ दक्षिणकाली नगरपालिका–७ का २६ वर्षीय योगबहादुर तामाङ र ३६ वर्षीय भविन्द्रकुमार तामाङ रहेका छन् । त्यस्तै, चितवन रत्ननगर नगरपालिका–५ का ३४ वर्षीय प्रवीण महतो, रौतहट गुजरा नगरपालिका–१ की २८ वर्षीया मुना धामी र चितवन कालिका नगरपालिका–५ का ३८ वर्षीय सत्यनारायण चौधरीलाई प्रहरीले नियन्त्रणमा लिएको छ ।

प्रहरीका अनुसार उनीहरूले काठमाडौँका विभिन्न स्थानमा ‘सक्कली जस्तै देखिने नक्कली नोट सजिलै साट्न वा प्रयोग गर्न सकिने’ भन्दै सर्वसाधारणलाई प्रलोभनमा पार्ने गरेका थिए । उनीहरूले सक्कली मुद्राभन्दा दुई गुणा बढी नक्कली मुद्रा सटही गरिदिने भन्दै पीडितलाई झुक्याएर ठगी गरेको सूचना प्रहरीले पाएको थियो ।

पक्राउ परेका ६ जनालाई नै थप अनुसन्धान तथा कानुनी कारबाहीका लागि जिल्ला प्रहरी परिसर काठमाडौँ पठाइएको अपराध अनुसन्धान कार्यालयले जनाएको छ ।