काठमाडौं – अमेरिकाले आफ्ना व्यापारिक जहाजहरूलाई खाडी क्षेत्रबाट टाढै रहन कडा चेतावनी जारी गरेको छ। इरानमाथि भएका हालैका आक्रमणहरूपछि उत्पन्न तनावलाई मध्यनजर गर्दै अमेरिकी यातायात मन्त्रालयले यस्तो आग्रह गरेको हो।

मन्त्रालय अन्तर्गतको सामुद्रिक प्रशासनले एक विज्ञप्ति जारी गर्दै स्ट्रेट अफ हर्मुज, ओमानको खाडी र अरब सागरमा महत्त्वपूर्ण सैन्य गतिविधि भइरहेको जनाएको छ। सुरक्षा जोखिम उच्च रहेकाले सम्भव भएसम्म व्यापारिक जहाजहरूलाई यी क्षेत्रहरूबाट टाढा रहन सुझाव दिइएको छ।

विशेष गरी अमेरिकाको झण्डा बोकेका, अमेरिकी स्वामित्वमा रहेका वा अमेरिकी चालक दल भएका जहाजहरूलाई अमेरिकी सैन्य जहाजहरूबाट कम्तीमा ३० समुद्री माइल अर्थात् करिब ५६ किलोमिटरको दूरी कायम गर्न भनिएको छ । कुनै पनि जहाजलाई अन्जानमा खतरा ठानेर आक्रमण नहोस् भन्नाका लागि यस्तो चेतावनी दिइएको अल जजीराले जनाएको छ ।

यसैबीच, कतारको यातायात मन्त्रालयले पनि आफ्नो क्षेत्रमा सामुद्रिक आवागमनलाई अस्थायी रूपमा स्थगित गरेको घोषणा गरेको छ। मध्यपूर्वमा बढ्दो सैन्य सक्रियताका कारण अन्तर्राष्ट्रिय जलमार्गहरू असुरक्षित बन्दै गएपछि विभिन्न देशहरूले आफ्ना ढुवानी मार्गहरूमा कडाइ गर्न थालेका छन्।