काठमाडौं– रसुवामा आएको विनाशकारी बाढीबाट प्रभावित नागरिकका लागि काठमाडौंमा सर्वसाधारणले स्वतःस्फूर्त रूपमा राहत सामग्री संकलन थालेका छन् ।
काठमाडौंको माइतीघर मण्डलामा विभिन्न क्षेत्रका नागरिकहरू भेला भएर बाढी प्रभावितका लागि आवश्यक खाद्यान्न, लत्ताकपडा, स्वास्थ्य सामग्री तथा बालबालिकाका लागि आवश्यक सामग्री संकलन गरिरहेका छन् ।
संकलित सामग्रीलाई वर्गीकरण तथा प्याकिङ गरी प्रभावित क्षेत्रतर्फ पठाउने तयारीसमेत गरिएको छ ।
बाढीका कारण रसुवा, नुवाकोट र धादिङका विभिन्न क्षेत्रमा जनजीवन प्रभावित भएपछि तत्काल आवश्यक पर्ने खाद्यान्न, खानेपानी, कपडा, औषधि तथा स्वास्थ्य सामग्रीको अभाव हुनसक्ने भन्दै नागरिकस्तरबाट सहयोग जुटाउन थालिएको हो ।
विशेषगरी बालबालिका, महिला, ज्येष्ठ नागरिक तथा विस्थापित परिवारलाई लक्षित गरी कपडा, जुत्ताचप्पल, कम्बल, सरसफाइका सामग्री र बालबालिकाका लागि आवश्यक सामग्रीसमेत संकलन गरिएको छ ।
राहत संकलनमा सहभागी नागरिकहरूले विपद्को समयमा सरकारी निकायसँगै समुदाय र सर्वसाधारणको सहयोग पनि उत्तिकै महत्वपूर्ण हुने बताएका छन् ।
उनीहरूले घरमा प्रयोगमा नआएका तर बाढी प्रभावितका लागि उपयोगी हुने सामग्री उपलब्ध गराउन तथा सक्नेले खाद्यान्न र स्वास्थ्य सामग्री सहयोग गर्न आग्रह गरेका छन् ।
संकलित राहत सामग्रीलाई आवश्यकताका आधारमा प्रभावित क्षेत्रमा पुर्याउने गरी व्यवस्थापन भइरहेको आयोजकहरूले बताएका छन् ।
तत्काल उद्धार र राहतको आवश्यकता रहेका परिवारसम्म सामग्री पुर्याउन स्थानीय तह तथा सम्बन्धित निकायसँग समन्वय गर्ने तयारीसमेत गरिएको छ ।
बाढीपछि प्रभावित क्षेत्रमा घर, सडक, पुल तथा अन्य भौतिक संरचनामा क्षति पुगेको र कतिपय परिवार विस्थापित भएको अवस्थामा नागरिकस्तरबाट जुटाइएको यस्तो सहयोगले प्रभावित परिवारलाई तत्काल राहत पुग्ने अपेक्षा गरिएको छ ।
तस्बिर : नेपाल फोटो लाइब्रेरी
प्रतिक्रिया