लमजुङ– पहिरोमा परी लमजुङको मध्यनेपाल नगरपालिका–७ भाटवेशीमा एकैघरका दुईजनाको मृत्यु भएको छ ।
आज बिहान गएको पहिरोले घर पुरिँदा भाटवेशीका ५९ वर्षीय टिकबहादुर विक र उनकी छोरी विनिता विकको मृत्यु भएको इलाका प्रहरी कार्यालय, भोर्लेटारका प्रहरी निरीक्षक ध्रुवप्रसाद शर्माले जानकारी दिए ।
घरमाथि रहेको नगरकुलो भत्केपछि पहिरोले दुईतले कच्ची घर पुरेको थियो । घटनामा विककी श्रीमती सुकमाया र जेठी छोरी अस्मिता घाइते भएको प्रहरीले बताएको छ । घाइतेलाई उद्धार गरी उपचारका लागि अस्पताल पठाइएको छ ।
विक परिवार स्थानीय विष्णुदत्त सुवेदीको घरमा बसोबास गर्दै आएको थियो ।
प्रतिक्रिया