काठमाडौं –  गत भदौ २३ र २४ को जेन-जी आन्दोलनबारे बुधबार प्रतिवेद सार्वजनिक गरेको राष्ट्रिय मानव अधिकार आयोगले फिल्म निर्देशक निश्चल बस्नेतमाथि अनुसन्धान गर्न सरकारलाई सिफारिस गरेको छ ।

आयोगले भदौ २३ र २४ को जेन-जी आन्दोलनमा मानवीय र भौतिक क्षति संलग्नता, अभिव्यक्तिबाटसमेत प्रदर्शनकारीहरू आक्रोशित र उत्तेजित भई कुनै असर र प्रभाव परे नपरेको, सार्वजनिक शान्ति र सुव्यवस्थामा खलल पुग्ने काम भए वा नभएको विषयमा अनुसन्धान गरिनुपर्ने व्यक्तिहरूको सूचीमा निश्चल पनि परेका हुन् ।

निश्चलमाथि अनुसन्धान गर्न र दोषी देखिए कारबाही गर्न सिफारिस गरेको प्रतिवेदनमा उल्लेख छ । त्यस्तै, भ्लगर सिसन बानियाँमाथि पनि अनुसन्धान गर्नुपर्ने प्रतिवेदनमा उल्लेख छ । अर्का पत्रकारसमेत रहेका अमनप्रताप अधिकारी र भ्लगर निशान मैनाली पनि उक्त सूचीमा छन्।

आयोगले समेत नाम उल्लेख गरेपछि प्रधानमन्त्री वालेन्द्र शाहनिकटसमेत रहेका निर्देशक बस्नेतले आफैंबाट अनुसन्धान थाल्न भनेका छन् ।

‘मानव अधिकार आयोगको प्रतिवेदनमा धेरै नामहरूमध्ये मेरो पनि नाम रहेछ’, उनले भनेका छन्, ’कृपया अनुसन्धानको सुरुवात चाहिँ मैबाट गरिदिनुहोला। दूधको दूध पानी को पानी छुट्याउनु पर्‍यो ।’

बस्नेतमाथि भदौको आन्दोलनमा सरकारी संरचना जलाउन उकासेको तथा सेलिब्रेसन गर्दै हिँडेको आरोप लागिरहेको छ।