दोलखा– जिल्लाको भीमेश्वर नगरपालिकाले आफ्नो क्षेत्रभित्र सञ्चालित सम्पूर्ण शिक्षण संस्थाहरूमा हप्ताको दुई दिन सार्वजनिक विदा दिने निर्णय कार्यान्वयनका लागि निर्देशन जारी गरेको छ ।

नगरपालिकाको शिक्षा शाखाले नगर क्षेत्रभित्रका सबै सामुदायिक र संस्थागत (निजी) विद्यालयहरूलाई परिपत्र गर्दै उक्त निर्णय अनिवार्य रूपमा पालना गर्न भनेको हो ।

​नेपाल सरकार मन्त्रिपरिषद्को निर्णय तथा शिक्षा तथा मानव स्रोत विकास केन्द्र, सानोठिमी भक्तपुरको परिपत्र बमोजिम भीमेश्वर नगरपालिकाको बैठकले उक्त निर्णय गरेको हो । 

नयाँ व्यवस्था अनुसार अबदेखि नगरपालिका क्षेत्रभित्रका सम्पूर्ण विद्यालयहरूमा हप्ताको दुई दिन-प्रत्येक हप्ताको शनिबार र आइतबार-सार्वजनिक बिदा दिनुपर्नेछ ।

नगरपालिकाका शिक्षा अधिकृत (सातौँ) प्रमिला कार्कीद्वारा हस्ताक्षरित परिपत्रमा भनिएको छ, ‘यस नगरपालिका क्षेत्रभित्रका शैक्षिक संस्था (सामुदायिक र संस्थागत दुवै) मा हप्तामा दुईदिन (शनिबार र आइतबार) सार्वजनिक बिदा दिने निर्णय भएकोले सोही बमोजिम गर्नु/गराउनु हुन निर्णयअनुसार अनुरोध छ।’

नगरपालिकाले निर्णयको प्रतिलिपिसहित उक्त परिपत्रको बोधार्थ शिक्षा तथा मानव स्रोत विकास केन्द्र (भक्तपुर), जिल्ला प्रशासन कार्यालय (दोलखा), र शिक्षा विकास तथा समन्वय इकाई (दोलखा) लाई समेत पठाएको छ ।

स्थानीय सरकारको यो निर्देशनसँगै नगरभित्रका सम्पूर्ण सरकारी तथा निजी विद्यालयहरूले हप्ताको दुई दिन बिदाको नियम कडाइका साथ लागू गर्नुपर्ने भएको छ । सुवाश बस्नेत/दोलखा