काठमाडौं– पछिल्लो २४ घण्टामा देशभर भएका विभिन्न विपदका घटनामा परी १० जनाको मृत्यु भएको छ । राष्ट्रिय विपद् जोखिम न्यूनीकरण तथा व्यवस्थापन प्राधिकरणको विपद् बुलेटिनअनुसार देशभर ५२ जिल्लामा ६९ वटा विपद् घटना भएका छन् । 

ती घटनामा परी २५ जना घाइते भएका छन् भने घटनाबाट करिब रु ३५ लाख १९ हजार बराबरको अनुमानित क्षति भएको छ भने ३१ चौपाया क्षति भएको विवरणमा उल्लेख छ ।

तथ्यांकअनुसार सबैभन्दा धेरै चट्याङका ३८ घटना भएका छन्, जसमा ५ जनाको मृत्यु र १९ जना घाइते भएका छन् । यसले कुल घटनामध्ये सबैभन्दा धेरै मानवीय क्षति चट्याङबाट भएको देखाएको छ । चट्याङपछि आगलागीका ११ घटना भएका छन्, जसमा १ जनाको मृत्यु र ३ जना घाइते भएका छन् । 

त्यस्तै लेक लागेर २ जना, सर्पदंशबाट १ र जनावर आक्रमणबाट १ जनाको मृत्यु भएको तथ्यांकले देखाएको छ । अन्य विपद्मा बाढी ३, पहिरो ३, हावाहुरी ४, अविरल वर्षा २, वन डढेलो १ र लेक लाग्ने २ घटना भएका छन् । यी घटनामा प्रत्यक्ष मानवीय क्षति कम देखिए पनि मौसमजन्य जोखिम भने देशभर फैलिएको संकेत देखिन्छ ।

प्रहरी परिचालनतर्फ हेर्दा विपद् व्यवस्थापनमा २६३ जना प्रहरी परिचालन गरिएको छ । सबैभन्दा धेरै चट्याङका घटनामा ११५ जना प्रहरी खटिएका छन् भने आगलागीमा ६०, जनावर आक्रमणमा २३, पहिरोमा २२ र हावाहुरीमा १५ जना प्रहरी परिचालन गरिएको छ ।