काठमाडौं– रसुवास्थित भोटेकोसी नदीमा बुधबार बिहान आएको भीषण बाढीपछि प्रभावित क्षेत्रमा उद्धार तथा राहत कार्यलाई तीव्र पारिएको छ। 

विपद्मा परेका नागरिकको उद्धार तथा सुरक्षाका लागि गृह प्रशासनले १३ हजार २९५ जना सुरक्षाकर्मी परिचालन गरेको छ।

उद्धार कार्यलाई व्यवस्थित र प्रभावकारी बनाउन नेपाल प्रहरीका ७ हजार २५०, नेपाली सेनाका ४ हजार २०० र सशस्त्र प्रहरी बल नेपालका १ हजार ८४५ जना सुरक्षाकर्मी खटिएका छन्।

बाढीका कारण सडक सञ्जाल अवरुद्ध भएकाले उद्धार टोलीले हवाई तथा पैदल मार्गबाट खोजी तथा उद्धार कार्य अघि बढाइरहेका छन्। स्थलगत पहुँच कठिन भएका क्षेत्रमा हवाई माध्यमबाट द्रुत उद्धार गरिएको छ।

नेपाली सेना तथा निजी हवाई कम्पनीका हेलिकप्टरले हालसम्म ६९ पटक उडान भरी जोखिमपूर्ण अवस्थामा फसेका ३५१ जनालाई सुरक्षित स्थानमा उद्धार गरेका छन्।

प्रतिकूल मौसम र नदीको तीव्र बहावका बाबजुद सुरक्षाकर्मीले जोखिम मोलेर उद्धार कार्यलाई निरन्तरता दिएका छन्। 

स्थानीय प्रशासन तथा सुरक्षा निकायले बाँकी प्रभावित क्षेत्रमा समेत खोजी, उद्धार तथा राहत वितरणको कार्यलाई थप तीव्र र व्यवस्थित बनाउँदै लगेका छन् ।