काठमाडौँ – रसुवाको भोटेकोशी नदीमा आएको विनाशकारी बाढीले तटीय क्षेत्रमा भारी क्षति पुर्‍याएपछि प्रधानमन्त्री वालेन्द्‍ शाह प्रभावित क्षेत्रको स्थलगत निरीक्षणका लागि बिहीबार बिहान नुवाकोटको विदुरतर्फ प्रस्थान गरेका हुन् ।
प्रधानमन्त्री शाहसँगै भौतिक पूर्वाधार तथा यातायात मन्त्री सुनिल लम्साल पनि टोलीमा छन्। उनीहरु बिहान ९:३० बजे सडकमार्ग हुँदै प्रभावित क्षेत्रतर्फ गएका हुन्।

संसद् र राजनीतिमा सर्वदलीय बैठकको दौडधुप भइरहँदा प्रधानमन्त्री शाह भने उद्धार र राहत कार्यलाई प्रत्यक्ष रूपमा सहजीकरण गर्न आफैँ मैदानमा गएका हुन् । यसअघि उनले उच्चस्तरीय बैठक आह्वान गरी उद्धार तथा राहत कार्यलाई तीव्रता दिन मातहतका निकायलाई कडा निर्देशन दिएका थिए ।

समयको सीमाका कारण प्रधानमन्त्री शाहले बिहीबार मुख्य रूपमा नुवाकोटको विदुर तथा त्यस आसपासका बाढी प्रभावित बस्तीको निरीक्षण गर्नेछन्। भ्रमणका क्रममा प्रधानमन्त्री र पूर्वाधारमन्त्रीले स्थानीय प्रशासन, जनप्रतिनिधि र सुरक्षा निकायसँग क्षति, राहत तथा पुनर्नर्मार्णका विषयमा छलफल गर्ने कार्यक्रम रहेको छ।

प्रधानमन्त्रीले बाढीका कारण अवरुद्ध बनेका सडक, पुल तथा विद्युत् जस्ता अत्यावश्यक पूर्वाधारहरू तत्काल पुनः सञ्चालन गर्न र पुनर्निर्माणको कामलाई तीव्रता दिन निर्देशन दिएका छन् ।