काठमाडौं– प्रथम काठमाडौं खेलमण्डल(एनआरटी) नेपाल टप-१६ ग्रान्ड मास्टर्स स्नूकर च्याम्पियनसिप यही साउन १३ गतेदेखि काठमाडौंमा आयोजना हुने भएको छ । 

काठमाडौं खेल मण्डल, न्यूरोड टीम(एनआरटी) ले सोमबार काठमाडौंमा पत्रकार सम्मेलन गर्दै नेपालका उत्कृष्ट १६ स्नूकर खेलाडीहरूको सहभागिता रहने मास्टर्स स्नूकर च्याम्पियनसिप साउन १३ गते सुरु हुने र साउन २३ गते समापन हुने जानकारी दिएको हो । 

प्रतियोगिताका बिजेतालाई नगद रु १ लाख ११ हजार १ सय ११ सहित च्याम्पियन ट्रफी प्रदान गरिने काठमाडौं खेल मण्डल, न्यूरोड टीम(एनआरटी)का महासचिव सतिश कृष्ण श्रेष्ठले जानकारी दिए । 

त्यस्तै उपबिजेतालाई ५१ हजार रुपैयाँसहित ट्रफी र सेमिफाइनलिस्टद्वयलाई जनही २५ हजार रुपैयाँसहित ट्रफी प्रदान गरिने उनको भनाइ छ । साथै सेन्चुरी ब्रेक गर्नेलाई २५ हजार दामाशाही रुपैयाँ र ८० अंकभन्दा बढी हाइयेष्ट ब्रेक गर्नेलाई नगद रु २० हजार दामाशाही र ट्रफी प्रदान गरिने महासचिव श्रेष्ठले जानकारी दिए । 

खेलको प्रवर्द्धन, खेलाडीहरूको क्षमता अभिवृद्धि तथा प्रतिस्पर्धात्मक वातावरण सिर्जना गर्ने लक्ष्यका साथ च्याम्पियनसिपको आयोजना गरिएको काठमाडौं खेल मण्डल, न्यूरोड टीम(एनआरटी)ले जनाएको छ ।