काठमाडौं–  राष्ट्रिय स्वतन्त्र पार्टीका नेता मनिष झाले सशक्त राजनीति गर्ने नेताहरू भिडिहने बताएका छन् ।

महामन्त्रीका केही उम्मेदवारहरूले महामन्त्रीकै अर्का उम्मेदवार विपिन आचार्यलाई सहयोग गर्दै पछि हटेपछि उनले यस्तो कटाक्ष गरेका हुन्।

महामन्त्रीको दह्रिलो दाबेदारका रूपमा रहेका झाले आलोकाँचो राजनीति गर्न नहुने भन्दै उम्मेदवारी फिर्ता लिनेमाथि व्यंग्य कसेका हुन् ।

 ‘यति आलोकाँचो राजनीति पनि गर्नुहुँदैन । हिजो राति उम्मेदवारी दिने, आज फिर्ता लिने ?’ उनले भने, ‘सशक्त राजनीति गर्न सक्ने आँट भएकाहरू भिडिरहन्छन्, परिणाम जेसुकै होस् निरन्तर लागिरहन्छन् ।’

आचार्यलाई सहयोग गर्नेगरी सभापत रवि लामिछानेका विश्वास पात्र प्रमोद न्यौपाने, गणेश पराजुली र कविन्द्र बुर्लाकोटी महामन्त्रीको दौडबाट हटेका थिए । उनीहरूमाथि मनिष खन्निएका हुन् ।

महामन्त्रीको दौडमा रहेका १० नेताहरूमध्ये यसअघि नै ललितपुरका जगदीश खरेलले पनि दाबेदारीबाट पछि हटेको घोषणा गरिसकेका थिए । अहिले पदाधिकारीका लागि चुनाव हुँदैछ।