काठमाडौं – राष्ट्रिय स्वतन्त्र पार्टी (रास्वपा) मा महामन्त्री पदका लागि १० जना नेताले उम्मेदवारी दिएका छन्। पार्टीभित्र सहमतिको प्रयास लगभग निष्कर्षविहीन बनेपछि निर्वाचन आयोगले उम्मेदवारहरूको नामावली सार्वजनिक गरेको हो।

निर्वाचन आयोगले सार्वजनिक गरेको सूचीअनुसार महामन्त्री पदको दौडमा गणेश पराजुली, गणेश कार्की, मनीष झा, विपिनकुमार आचार्य, कवीन्द्र बुर्लाकोटी, सागर ढकाल, रञ्जु दर्शना, प्रमोद खरेल, राजु पाण्डे र जगदीश खरेल रहेका छन्।

उम्मेदवारहरूको सूचीमा १० जनामध्ये रञ्जु दर्शना मात्रै महिला उम्मेदवार रहेकी छन्। यसले महामन्त्री पदको प्रतिस्पर्धामा महिला सहभागिता न्यून रहेको देखाएको छ।

रास्वपाले पदाधिकारी चयनका लागि सहमतिबाट नेतृत्व टुंग्याउने प्रयास गरे पनि प्रमुख पदहरूमा आकांक्षी संख्या धेरै भएपछि निर्वाचनको प्रक्रिया अघि बढेको हो। अब महामन्त्री पदका लागि यी १० उम्मेदवारबीच प्रतिस्पर्धा हुने भएको छ।