काठमाडौँ – काठमाडौँ महानगरपालिका–९ स्थित गैरीगाउँ–सिनामङ्गलमा अतिक्रमण गरी निर्माण गरिएका घरटहरा बत्तीको भरमा भत्काइएको छ । यो क्षेत्रमा घरटहरा भत्काउन ठूलो सङ्ख्यामा सुरक्षाकर्मी परिचालन गरिएको थियो ।

काठमाडौँ–९ गैरीगाउँको सुकुम्वासी बस्ती खाली गरिएको छ । गैरीगाउँमा अतिक्रमण गरी निर्माण गरिएका घरटहरा हटाएर टोली सिनामङ्गलस्थित सुकुम्वासी बस्ती हताइएको हो ।

सरकारको निर्देशनअनुसार अतिक्रमण गरी निर्माण गरिएका संरचना तथा बस्ती भत्काउने अभियान शनिबार बिहानदेखि तीव्र बनाइएको हो । शनिबार दिउँसोदेखि सुरु गरिएको उक्त अभियानमा नेपाल प्रहरी, सशस्त्र प्रहरी बल तथा काठमाडौँ महानगर प्रहरीको संयुक्त टोली परिचालन गरिएको छ ।

सिनामङ्गलस्थित सुकुम्वासी बस्तीका साना घरटहरा भत्काइसकेर ठूला घर भत्काइएको जिल्ला प्रहरी परिसर काठमाडौँका प्रवक्ता तथा प्रहरी उपरीक्षक पवनकुमार भट्टराईले जानकारी दिए ।

काठमाडौँ उपत्यका विकास प्राधिकरणका अनुसार काठमाडौँको शान्तिनगरमा ४७६, गैरीगाउँमा १६२, थापाथलीमा १४३ र गोठाटारमा ७७ सुकुम्वासीका नाममा घरटहरा निर्माण गरिएका छन् ।

नेपाल प्रहरी, सशस्त्र प्रहरी बल नेपाल र काठमाडौँ महानगरपालिकाको नगर प्रहरीको संयुक्त टोलीले अवैध रूपमा निर्माण गरिएका संरचना हटाएर ती ठाउँमा बसोबास गर्दै आएका नागरिकका सरसामन हटाउन र अन्यत्र लैजान सहयोग गरिरहेका छन् ।
राति नै मनोहरा खोला किनारको बस्ती हटाउन पुगेका सुरक्षाकर्मीमाथि भने आक्रमण हुँदा २२ जना घाइते भएका छन् । उनीहरुको काठमाडौँका विभिन्न अस्पतालमा उपचार भइराखेको छ ।