काठमाडौं– गत भदौ २३ र २४ गते काठमाडौंमा जेन-जीका नाममा भएका हिंसात्मक घटनाको छानबिन गर्न गठित गौरीबहादुर कार्की नेतृत्वको जाँचबुझ आयोगले एउटा गम्भीर सुझाव पनि सरकारलाई दिएको छ।

पूर्वन्यायाधीश कार्की नेतृत्वको आयोगले काठमाडौं उपत्यकाभित्रका गुम्बा, मदरसा र चर्चहरूको गतिविधिमा निगरानी बढाउन सरकारलाई सुझाव दिएको छ।

आयोगको प्रतिवेदनमा काठमाडौं उपत्यकाभित्रका डाँडाहरूमा निर्माण गरिएका विशाल र आलिशान गुम्बाहरूको सरकारले प्रभावकारी अनुगमन गर्नुपर्ने उल्लेख गरिएको छ।

यसका साथै मुस्लिम समुदायका बालबालिका अध्ययन गर्ने मदरसा तथा क्रिश्चियन समुदायका चर्चहरूमा आउने फण्ड र त्यहाँ सञ्चालन हुने गतिविधिको नियमित निगरानी गर्न आवश्यक रहेको आयोगले ठहर गरेको छ।

उक्त आयोगले यस्ता संस्थाहरूमा हुने गतिविधिले राष्ट्रिय सुरक्षामा प्रभाव पार्न सक्ने भन्दै मुलुकले आफ्नो गुप्तचरी क्षमता तत्काल बढाउनुपर्ने पनि सरकारलाई भनेको छ।

उक्त प्रतिवेदनमा भदौ २३ गते नयाँबानेश्वरस्थित संसद् भवन परिसरमा भएको घटनालाई थप उत्तेजित बनाउन तिब्बतियन ओरिजिन ब्लुड (टीओबी) समूहका मोटरसाइकल सवार युवाहरू सक्रिय देखिएको उल्लेख गरिएको छ।

उनीहरूको त्यस गतिविधिले नेपाल मात्रै नभई छिमेकी चीनसमेत सशंकित बनेको आयोगको निष्कर्ष छ। नेपालले एक चीन नीति अपनाउने गरेको छ । तर उक्त आन्दोलनमा तिब्बती शरणार्थीहरू खुला रूपमा उत्रेको पाइएको थियोे ।

छिमेकी राष्ट्रविरुद्ध नेपालको भूमि प्रयोग भएमा नेपाललाई जटिल अवस्थामा पार्न सक्ने चेतावनी पनि आयोगले प्रतिवेदनमा दिएको छ।

यद्यपि, भदौ २३ र २४ को आन्दोलनमा टीओबीको संलग्नताबारे उल्लेख गरिए पनि आयोगले उनीहरूमाथि कारबाहीको सिफारिस गरेको छैन। आयोगले राष्ट्रिय सुरक्षासँग जोडिएका संवेदनशील विषयमा सरकारलाई थप सतर्क रहन आग्रह गरेको छ।