काठमाडौं – पत्रकार अर्जुन आचार्यमाथि झापामा आक्रमण भएको छ । आचार्यले खबर हबलाई दिएको जानकारी अनुसार एमाले कार्यकर्ताले उनीमाथि आक्रमण गरेका हुन् ।

नेशनल भोलेन्टियर्स फोर्सको टोपी लगाएका कार्यकर्ताले आक्रमण गरेको पत्रकार आचार्यले जानकारी दिए। आक्रमणका क्रममा पत्रकार आचार्यको आँखामा चोट लागेको छ। उनी रातोपाटी अनलाइनमा कार्यरत छन् ।

झापाको कमल गाउँपालिकास्थित जीवन चोकमा रिपोर्टिङ गरिरहेका आचार्यमाथि एमालेको ‘भोलेन्टियर फोर्स’ का सदस्यहरूले बिहीबार दिउँसो आक्रमण गरेका हुन् । बा २५६१ नम्बरको स्कर्पियोमा चढेर आएका फोर्सका सदस्यहरूले आचार्यमाथि कुटपिट गरेको प्रत्यक्षदर्शीले बताएका छन् ।

नेकपा एमालेका अध्यक्ष केपी शर्मा ओलीको घरदैलो र सचिवालयको टोलीलाई पछ्याउने क्रममा उक्त घटना घटेको हो।

घरदैलो कार्यक्रम भइरहँदा स्थानीय महिलाहरूले राष्ट्रिय स्वतन्त्र पार्टीको चुनाव चिन्ह ‘घण्टी’ देखाएर साङ्केतिक विरोध जनाएका थिए। त्यसपछि आक्रोशित बनेका एमाले कार्यकर्ताहरूले ती महिलाहरूमाथि अश्लील शब्द प्रहार गर्दै दुर्व्यवहार गर्न थालेपछि पत्रकार आचार्यले सो दृश्यको फोटो र भिडियो खिच्न खोजेका थिए । दृश्य कैद गर्न खोज्दा आचार्यमाथि समूहबद्ध रूपमा आक्रमण भएको हो ।

आक्रमणकारीहरूले आचार्यको मोबाइल खोसेर लगेका छन् भने उनको चस्मा समेत फुटाइदिएका छन् । आक्रमणबाट आचार्यको आँखा, गाला र ढाडमा चोट लागेको छ । घटनास्थलमा रहेका अन्य पत्रकारहरूले उनलाई उद्धार गरी सुरक्षित स्थानतर्फ लगेको आचार्यले जानकारी दिएका छन।

घटनाको बारेमा जिल्ला प्रहरी कार्यालय झापालाई समेत जानकारी भएकाले अनुसन्धान अगाडि बढाइएको बताइएको छ ।