काठमाडौँ – कर्णाली प्रदेशको पहाडी क्षेत्रमा देखिएका हवाई उडानसम्बन्धी समस्या र तिनको दिगो समाधानका उपायबारे सरोकारवाला निकायबीच गहन छलफल भएको छ।

संस्कृति, पर्यटन तथा नागरिक उड्डयनमन्त्री खडक राज पौडेल ‘गनेस’ को उपस्थितिमा कर्णाली प्रदेशका उद्योग, पर्यटन, वन तथा वातावरणमन्त्री, पर्यटन मन्त्रालयका सचिव तथा सहसचिव, नेपाल नागरिक उड्डयन प्राधिकरण (क्यान) का महानिर्देशक र दुर्गम क्षेत्रमा सेवा दिइरहेका निजी वायुसेवा सञ्चालकहरूबीच बैठक बसेको हो।

छलफलका क्रममा कर्णालीका पहाडी तथा दुर्गम जिल्लाहरूमा नियमित र सुरक्षित हवाई सेवा सञ्चालन गर्दा भोग्नुपरेका व्यावहारिक तथा प्राविधिक समस्याहरूबारे विस्तृत समीक्षा गरिएको थियो। साथै, सर्वसाधारणलाई हवाई सेवामा पहुँच सहज बनाउने, उडानलाई नियमित र प्रभावकारी बनाउने तथा देखिएका चुनौतीहरू सम्बोधन गर्न चाल्नुपर्ने सम्भावित कदमबारे सरोकारवालाहरूले आ-आफ्नो धारणा राखेका थिए।

सरकार र वायुसेवा सञ्चालकहरूबीच भएको यस विचारविमर्शले कर्णालीको हवाई यातायातलाई थप व्यवस्थित र भरपर्दो बनाउन सहयोग पुग्ने विश्वास लिइएको छ।