काठमाडौं- नेपालमा बुधबार आएको आकस्मिक बाढीबाट प्रभावित भारतीय नागरिकको उद्धार तथा राहतका लागि नेपालस्थित भारतीय दूतावास सक्रिय भएको छ।

भारतीय दूतावासले नेपाल सरकारका सम्बन्धित निकायसँग समन्वय गरी बाढी प्रभावित भारतीय नागरिकको शीघ्र उद्धार तथा राहतका लागि पहल भइरहेको जनाएको छ।

दूतावासले नेपाल सरकारसँगको समन्वयमा उद्धार तथा राहतका प्रयासलाई थप सुदृढ बनाउँदै लगिएको जनाएको छ।

बाढीबाट प्रभावित भारतीय नागरिकसम्बन्धी जानकारी तथा सहयोग आवश्यक परेमा दूतावासले दुईवटा आपत्कालीन नम्बरमा सम्पर्क गर्न आग्रह गरेको छ।

आपत्कालीन सम्पर्क नम्बर
+९७७ ९८५ १३१ ६८०७
+९७७ ९७० ९१० ७५००

नेपालमा बुधबार आएको भीषण बाढीका कारण रसुवालगायतका क्षेत्रमा ठूलो जनधनको क्षति भएको छ। बाढीका कारण नेपाल भ्रमणमा आएका विदेशी नागरिकसमेत प्रभावित भएको विवरणहरू सार्वजनिक भइरहेका छन्।

‘काठमाडौं पोस्ट’को रिपोर्टअनुसार रसुवामा बाढीका कारण अहिलेसम्म ५ जनाभन्दा बढीको मृत्यु भएको छ भने २५ जनाभन्दा बढीको उद्धार गरिएको छ।

नेपालमा आएको जलप्रलयपछि बिहारका सीमावर्ती जिल्लामा समेत सतर्कता जारी गरिएको छ। बाढीमा थुप्रै विदेशी पर्यटक फसेको खबरसमेत आएको छ। 

भारतीय समाचार च्यानन ‘आज तक’को रिपोर्टअनुसार १०५ जना भारतीय पर्यटक बेपत्ता भएको दाबी गरिएको छ।