काठमाडौं – नेपाली कांग्रेसले भारतको जेलमा रहेका दुई नेपाली किसानको अविलम्ब रिहाइका लागि कूटनीतिक तथा कानुनी पहल गर्न सरकारसँग माग गरेको छ ।

कांग्रेसका कार्यवाहक मुख्य सचिव कृष्णप्रसाद दुलालले बुधबार जारी गरेको विज्ञप्तिमा सर्लाहीको बलरा नगरपालिका निवासी किसान सुरेशप्रसाद सिंह र नागेन्द्रप्रसाद सिंह भारतीय जेलमा रहेको विषयप्रति पार्टीको गम्भीर ध्यानाकर्षण भएको जनाइएको छ ।

कांग्रेसका अनुसार बजारमा समयमै रासायनिक मल नपाएपछि ती दुई किसान सीमावर्ती भारतीय बजार सोनवरसाबाट युरिया र डीएपी मल खरिद गरेर नेपाल फर्किने क्रममा भारतीय सुरक्षा निकायबाट पक्राउ परेका हुन् । उनीहरूलाई विगत २० दिनदेखि भारतको बिहार राज्य अन्तर्गत सीतामढीको डुमरास्थित जेलमा राखिएको बताइएको छ ।

विज्ञप्तिमा ती किसानले व्यावसायिक कारोबारका लागि नभई आफ्नै खेतमा प्रयोग गर्ने उद्देश्यले दुई बोरा मल खरिद गर्न गएको उल्लेख गर्दै परिवार र स्थानीय समुदायसँग जानकारी लिएर घटनाको वास्तविकता बुझ्ने प्रयास गरिएको जनाएको छ ।

कांग्रेसले दुई बोरा मल खरिद गर्न बाध्य भएका किसान जेलमा रहँदा नेपालमा मल गोदाममै थन्किएको अवस्था विडम्बनापूर्ण भएको टिप्पणी गरेको छ । “मल गोदाममा, किसान जेलमा” भन्ने अवस्था अत्यन्त दुःखद भएको कांग्रेसको भनाइ छ ।

पार्टीले सरकारलाई उनीहरूको रिहाइका लागि व्यवहारिक, कूटनीतिक र कानुनी प्रक्रियामार्फत तत्काल पहल गर्न आग्रह गरेको छ । साथै भारत सरकारसमक्ष पनि नेपाल–भारतबीचको ऐतिहासिक मित्रता, खुला सीमा, पारस्परिक विश्वास र दुई देशका नागरिकबीचको आत्मीय सम्बन्धलाई ध्यानमा राख्दै खेतीका लागि मल खरिद गर्ने क्रममा पक्राउ परेका किसानलाई अविलम्ब रिहा गर्न अनुरोध गरेको छ ।

नेपाली कांग्रेसले नेपाल–भारत सम्बन्ध केवल दुई सरकारबीच सीमित नभई दुई देशका जनताबीचको ऐतिहासिक, सांस्कृतिक र सामाजिक सम्बन्धमा आधारित रहेको उल्लेख गर्दै यस्ता संवेदनशील विषयलाई सोही भावनाअनुसार समाधान गर्न दुवै सरकारसँग आग्रह गरेको छ ।