काठमाडौं– बिभिन्न दलका सांसदहरूले नेपालका आदिवासी जनजातिहरूको हक, अधिकार स्थापित गर्न प्रतिबद्ध रहेको बताएका छन् ।  

नेपाल आदिवासी जनजाति महासंघले सोमबार काठमाडौंमा आयोजना गरेको कार्यक्रममा उनीहरूले मुलुकको परिवर्तनमा आदिवासी जनजाति महत्त्वपूर्ण रहेको भन्दै हक, अधिकार स्थापित गर्न प्रतिबद्ध रहेको बताएका हुन् ।

आदिवासी जनजातिहरूको हक, अधिकार, पहिचान, सम्मान तथा समान सहभागिताको सुनिश्चितता अपरिहार्य रहेको उनीहरूको भनाइ छ ।

कार्यक्रममा कांग्रेस सचेतक निश्कल राईले आदिवासी जनजातिहरूको हक, अधिकारका लागि पार्टीले धेरै काम गरेको भन्दै आगामी दिनमा पनि अधिकार स्थापित गर्न लाग्ने प्रतिबद्धता जनाए ।

आदिवासी जनजातिको पहिचान र संस्कृतिलाई राज्यले बुझ्न नसकेको भन्दै उनले आदिवासी जनजाति नै क्रियाशील हुनुपर्ने बताए ।

त्यस्तै एमालेका सांसद क्षितिज थेबेले संविधान संशोधनको बहस अघि बढिरहेकाले संशोधन गर्ने क्रममा आदिवासी जनजातिहरूको हक, अधिकारमा जोड दिने बताए  ।

त्यस्तै अन्य दलका सांसदहरूले आदिवासी जनजातिहरूको हक, अधिकारसम्बन्धी महासंघको अडान जायज भएको भन्दै आदिवासी जनजातीको योगदानलाई सम्मान गर्नुपर्नेमा जोड दिएका थिए ।