बेइजिङ– भारत र चीनले सीमा क्षेत्रमा शान्ति तथा स्थिरता कायम गर्दै द्विपक्षीय सम्बन्धलाई थप सुधार गर्ने उपायबारे छलफल गरेका छन्।

दुईदिने चीन भ्रमणमा रहेका भारतका राष्ट्रिय सुरक्षा सल्लाहकार अजित डोभालले मंगलबार चिनियाँ उपराष्ट्रपति हान झेङसँग भेटवार्ता गरेका हुन्। 

भारत–चीन सीमा प्रश्नसम्बन्धी विशेष प्रतिनिधिको २५औँ चरणको वार्ताअघि भएको भेटमा सीमा क्षेत्रमा शान्ति र स्थिरता सुदृढ गर्ने तथा आर्थिक, राजनीतिक र बहुपक्षीय क्षेत्रमा सहकार्य बढाउने विषयमा छलफल भएको चीनस्थित भारतीय दूतावासले जनाएको छ।  

भारतीय विदेश मन्त्रालयका प्रवक्ता रणधीर जयसवालले दुवै पक्षले पछिल्लो घटनाक्रमको समीक्षा गर्दै द्विपक्षीय सम्बन्धलाई क्रमशः सामान्य बनाउने दिशामा प्रगति भइरहेको बताएका छन्। उनले स्थिर, पूर्वानुमानयोग्य र रचनात्मक सम्बन्धले दुई देशबीच विश्वास तथा समझदारी बढाउन सहयोग गर्ने बताए।

यसै क्रममा डोभाल र चिनियाँ विदेशमन्त्री वाङ यीबीच भारत–चीन सीमा प्रश्नसम्बन्धी विशेष प्रतिनिधिको २५औँ चरणको वार्ता हुँदैछ। गत जुनमा नयाँदिल्लीमा आयोजित ब्रिक्स राष्ट्रिय सुरक्षा सल्लाहकारहरूको बैठकका क्रममा पनि डोभाल र वाङबीच भेटवार्ता भएको थियो।

भारत–चीन सम्बन्ध सुधारका प्रयासबीच गत वर्ष तियानजिनमा आयोजित एससीओ शिखर सम्मेलनका क्रममा भारतीय प्रधानमन्त्री नरेन्द्र मोदी र चिनियाँ राष्ट्रपति सी चिनफिङबीच भेटवार्ता भएको थियो। सो अवसरमा दुवै नेताले भारत र चीन विकासका साझेदार रहेको तथा मतभेदलाई विवादमा परिणत हुन दिन नहुनेमा जोड दिएका थिए।

सीमा विवादका कारण लामो समयदेखि तनावपूर्ण रहँदै आएको भारत–चीन सम्बन्धलाई उच्चस्तरीय संवाद र कूटनीतिक पहलमार्फत क्रमशः सामान्य बनाउने प्रयास जारी रहेको छ।