काठमाडौं– राष्ट्रिय स्वतन्त्र पार्टी (रास्वपा)ले आफ्नो राजनीतिक दस्ताबेजबाट माओवादी सशस्त्र युद्धको इतिहासलाई अस्वीकार गरिदिएको छ । मंगलबार रास्वपा सभापति रवि लामिछानेले पार्टीको पहिलो महाधिवेशनमा प्रस्तुत गरेको राजनीतिक दस्ताबेजमा इतिहासका विभिन्न राजनीतिक परिवर्तनलाई समेटिएको भएपनि माओवादी सशस्त्र युद्ध भने अटाएको देखिँदैन ।

सभापति लामिछानेले प्रस्तुत गरेको राजनीतिक प्रतिवेदनको ‘बलिदानप्रति कृतज्ञ छौँ र भविष्यप्रति विश्वस्त’ भन्ने खण्डमा २००७ सालको क्रान्ति, २०४६ सालको आन्दोलन र २०६२-६३ सालको आन्दोलनलाई सम्मानजनक इतिहासका रूपमा सम्बोधन गरिएको छ । साथै, ती क्रान्ति र आन्दोलनबाट प्राप्त उपलब्धिको रक्षा गर्दै बलिदानको अवमूल्यन हुन नदिने प्रतिबद्धता जनाइएको छ ।

तर, झण्डै सबै राजनीतिक दलले नकारात्मक वा सकारात्मक रूपमा आफ्नो राजनीतिक दस्ताबेजमा प्रस्तुत गर्ने गरेको १० वर्षे माओवादी सशस्त्र युद्धलाई भने रास्वपाले आफ्नो राजनीतिक दस्ताबेजबाट हटाइदिएको छ । 

बरु रास्वपाले महिला, दलित, मधेसी, जनजाति, आदिवासीका आन्दोलनको बलिदान र समावेशितामा त्यसको ऐतिहासिक योगदानलाई सम्मान गर्दै आफूहरू इतिहासका कृतज्ञ उत्तराधिकारी भएको दाबी गरेको छ ।