काठमाडौं– सुकुम्बासीको नाममा सयौं टहरा भएको काठमाडौंबाट जम्मा २३ जनाले मात्रै आफूहरू सुकुम्बासी भएको भन्दै निवेदन दिएका छन् ।

भूमि समस्या समाधान आयोगका अनुसार बिहीबारसम्म काठमाडौं महानगरभित्रबाट १४ जना भूमिहीन दलित सुकुम्बासी र ९ जना भूमिहीन सुकुम्बासीले निवेदन दिएका हुन् । त्यस्तै, महानगरभित्रबाट ३३ जनाले अव्यवस्थित बसोबासीको रूपमा निवेदन दिएको आयोगले जनाएको छ ।

देशैभरीबाट झण्डै २ लाख ८० हजारको निवेदन

आफूहरू भूमिहीन सुकुम्बासी भएको भन्दै देशैभरीबाट आयोगमा २ लाख ७८ हजार ५०७ जनाले भूमिको लागि निवेदन दिएका छन् । जसमध्ये ९८ हजार ४०८ जना भूमिहीन दलित सुकुम्बासी र १ लाख ८० हजार ९९ भूमिहीन सुकुम्बासीको निवेदन रहेको आयोगले जनाएको छ ।

प्रदेशगत रूपमा हेर्दा सुदूरपश्चिम प्रदेशबाट २८ हजार ४४८ जना, लुम्बिनी प्रदेशबाट ६६ हजार ५२८ र मधेश प्रदेशबाट ५० हजार २०३ जनाले भूमिहीन दलित सुकुम्बासी तथा भूमिहीन सुकुम्बासीको नाममा निवेदन दिएका छन् । 

त्यस्तै, बागमती प्रदेशबाट २८ हजार ४६१, गण्डकी प्रदेशबाट २१ हजार ६४४, कोशी प्रदेशबाट ७८ हजार ४२६ र कर्णाली प्रदेशबाट ४ हजार ७९७ जना भूमिहीन दलित सुकुम्बासी तथा भूमिहीन सुकुम्बासीले निवेदन दिएको आयोगले जनाएको छ ।