काठमाडौं- नेपाली कांग्रेसको केन्द्रीय कार्यसमितिको बैठक पार्टी केन्द्रीय कार्यालय सानेपामा जारी छ। बैठकमा १५औँ महाधिवेशन बोलाउने विषय प्रमुख एजेन्डाका रूपमा छलफल भइरहेको छ।

कांग्रेसले आगामी भदौ २४ गते संस्थापक बीपी कोइरालाको जन्मजयन्ती पारेर महाधिवेशन उद्घाटन गर्ने तयारी गरेको बताइएको छ।

बैठकमा सभापति गगनकुमार थापाले सम्बोधन गर्दै आफ्नो हालैको राजीनामाबारे स्पष्टीकरण दिएका छन्। उनले आफू कुनै दबाबमा नभई स्वेच्छाले राजीनामा दिने निर्णयमा पुगेको बताएका छन्।

थापाले निर्वाचनलगत्तै राजीनामा दिन चाहेको तर केही प्राविधिक कारणले ढिलाइ भएको उल्लेख गरे। उनले चैत ३ गते नै राजीनामाको विषय टुंग्याएको जानकारी दिए।

‘म नेपाली कांग्रेसको सभापति हुँ, टिमको क्याप्टेन हुँ। मेरो नेतृत्वमा पार्टी चुनावमा गएको हो, त्यसैले म जवाफदेही हुनुपर्छ,’ थापाले भने।

पार्टीभित्रका उपसभापति र महामन्त्रीहरूसमेतप्रति आफू जवाफदेही हुनुपर्ने महसुस गर्दै राजीनामा दिएको उनले बताए । उनले यसबीच कार्यकर्ताबाट ठूलो माया, विश्वास र समर्थन पाएको पनि बताए।

गत बुधबार दिएको थापाको राजीनामा आइतबार बसेको केन्द्रीय कार्यसमिति बैठकले अस्वीकृत गरेको थियो। त्यसपछि मंगलबारको बैठकमा उनी सहभागी भएर सम्बोधन गरिरहेका हुन्।

थापाले अब को सही र को गलत भन्ने बहसमा अल्झिनु आवश्यक नभएको उल्लेख गर्दै यसको अन्तिम टुंगो महाधिवेशनले लगाउने बताए। ‘अब छलफल र निर्णय महाधिवेशनबाटै हुन्छ,’ उनले भने।

उनले महाधिवेशनको समय र प्रक्रियाबारे आफूले प्रस्तावहरू राख्ने पनि जानकारी दिएका छन्।