काठमाडौं- राष्ट्रिय स्वतन्त्र पार्टीबाट काठमाडौं क्षेत्र नम्बर १ की उम्मेदवार रञ्जु दर्शना प्रसूतिका लागि निजामती अस्पताल भर्ना भएकी छिन् ।

मंगलबार बिहान ११ बजे सामाजिक सञ्जाल फेसबुकमा भिडियो पोस्ट गर्दै उनले प्रसुतिका लागि अस्पताल भर्ना भएकी हुन्। उनले प्रसूतिका लागि जानुअघि आमा बन्न लागेको भन्दै खुसी साटेकी छन् ।

‘म यहाँ सिभिल अस्पतालमा भर्ना छु । आज मेरो एकदमै स्पेशल दिन हो । म आमा बन्ने तयारीमा छु । म र मेरो भविष्य दुवैलाई शुभकामना दिनुहोला,’ उनले सामाजिक सञ्जालमा पोष्ट गरेको भिडियोमा भनेकी छन् ।

तत्कालीन विवेकशील साझा पार्टीबाट उम्मेदवारी मनोनयन अघिमात्रै प्रवेश गरेकी उनलाई रास्वपाले समानुपातिक उम्मेदवार बनाएको थियो ।

जसको मुख्य कारण थियो, उनको ८ महिने गर्भावस्था । तर त्यसको विरोध भएपछि उनले समानुपातिक सूचीबाट चुनाव नलड्ने घोषणा गर्दै प्रत्यक्ष उम्मेदवार बनिन् ।।

निर्वाचन प्रचारप्रसारकै क्रममा दहीचिउरा लगायतका संस्कार पूरा गरेकी उनी सुत्केरी व्यथाले च्यापेपछि अस्पताल भर्ना भएकी हुन् ।

उनलाई डाक्टरले प्रसूति हुने मिति फागुन १८ गतेलाई दिएका थिए । तर त्यसअघि व्यथाले च्यापेपछि उनी अस्पताल भर्ना भएको परिवारका सदस्यले बताएका छन्।

उनी अस्पताल भर्ना भए पनि चुनाव प्रचारप्रसार मतदातासँग भोट माग्ने काम रोकिएको छैन। काठमाडौं १ का रास्वपा कार्यकर्ता पुरुषेत्तम भट्टराईले चुनावी अभियान जारी रहेको बताए ।

‘आज बिहान बागमती किनार क्षेत्र गएर प्रचारप्रसार सक्यौं । साँझको पनि कार्यक्रम तय भइसकेको छ,’ भट्टराईले थपे, ‘अब यहाँकी समानुपातिक उम्मेदवार समीक्षा बास्कोटा लगायतलाई बोलाएर प्रचारप्रसार गर्ने योजना बनाएका छौं ।