काठमाडौं– राष्ट्रिय व्यावसायिक पहलले स्केन्डर इलेक्ट्रिकको सहयोगमा रसुवा भोटेकोशी बाढीबाट प्रभावित समुदायका लागि प्राप्त १ हजार थान सौर्य लालटिन नेपाल सरकारलाई हस्तान्तरण गरेको छ। उक्त राहत सामग्री सामाखुशीस्थित राहत संकलन केन्द्रमा हस्तान्तरण गरिएको हो ।

अझै पनि विद्युतीय पहुँचबाट टाढा रहेका बाढी प्रभावित परिवारको आवश्यकतालाई सम्बोधन गर्ने उद्देश्यले करिब ४३ लाख रुपैयाँ बराबरको ‘मोविया ओरिजिनल’ सौर्य लालटिन सहयोग गरिएको हो । यो राहत सामग्री राष्ट्रिय व्यावसायिक पहल तथा स्केन्डर इलेक्ट्रिकका प्रतिनिधिहरूको उपस्थितिमा हस्तान्तरण गरिएको थियो ।

विपद् प्रभावित समुदायलाई समयमै सहयोग पुर्‍याउन निजी क्षेत्र, सरकार तथा अन्य सरोकारवालाहरूसँगको सहकार्यलाई निरन्तरता दिइने राष्ट्रिय व्यावसायिक पहलले जनाएको छ ।