भद्रपुर-  झापाको कमल गाउँपालिका–५ पाडाजुंगीस्थित सशस्त्र प्रहरी बल नेपाल नम्बर ३८ रिजर्भ गणमा कार्यरत एक सशस्त्र प्रहरी जवानको विद्युत् लाइन मर्मत गर्ने क्रममा करेन्ट लागेर मृत्यु भएको छ।

सशस्त्र प्रहरी बल नेपाल नम्बर १ बराह बाहिनी मुख्यालय, कोशी प्रदेशका सूचना अधिकारी तथा वरिष्ठ सशस्त्र प्रहरी उपरीक्षक महेश केसीका अनुसार सुनसरीको इटहरी उपमहानगरपालिका–१३ निवासी ३० वर्षीय सशस्त्र प्रहरी जवान सुदिम खत्री बिहीबार साँझ करिब ५ बजे गण परिसरभित्र आन्तरिक विद्युत् लाइन मर्मत गर्ने क्रममा करेन्ट लागेर गम्भीर घाइते भएका थिए।

घटनालगत्तै उनलाई उपचारका लागि दमकस्थित आम्दा अस्पताल पुर्‍याइएको थियो। अस्पतालले उपचारका क्रममा उनलाई मृत घोषणा गरेको वरिष्ठ सशस्त्र प्रहरी उपरीक्षक केसीले जानकारी दिए।

प्रहरीका अनुसार मृतक खत्रीले प्राविधिक शिक्षा तथा व्यावसायिक तालिम परिषद् (सीटीईभीटी)बाट विद्युत् सम्बन्धी तालिम प्राप्त गरेका थिए।

घटनाको कारणबारे आवश्यक अनुसन्धान भइरहेको सशस्त्र प्रहरी बलले जनाएको छ।