काठमाडौँ- अमेरिकाका राष्ट्रपति डोनाल्ड ट्रम्पले इरानका सर्वोच्च नेता मोज्तबा खामेनीको मृत्यु नहोस् भन्ने चाहेको बताएका छन्।

उनले मोज्तबा जीवित छन् कि छैनन् भन्ने पनि थाहा नभएको बताएका छन्।

फ्लोरिडामा पत्रकारहरूसँग कुरा गर्दै ट्रम्पले भने, ‘इरानमा शासन परिवर्तन सम्भव छ र यस सम्बन्धमा विशिष्ट व्यक्तिसँग छलफल भइरहेको छ।’

यस्तै उनले अमेरिकाले इरानमा नयाँ राजनीतिक प्रणालीको विकल्पमा काम गरिरहेको दाबी पनि गरे।

ट्रम्पले भने, ‘भेनेजुएलाजस्तै नयाँ नेता ल्याउन सकिन्छ वा अमेरिकासँग संयुक्त नेतृत्व मोडेल अपनाउन पनि सकिन्छ।’

अमेरिका-इजरायले गत फेब्रुअरी २८ मा संयुक्त हवाई हमला गरी इरानका सर्वोच्च नेता अयातोल्लाह अली खामेनीलगायत शीर्ष नेता तथा अधिकारीको हत्या गरेयता निरन्तर युद्ध जारी छ।

यसबिच इरानका सर्वोच्च राष्ट्रिय सुरक्षा परिषद्का सचिव अली लारिजानी र इस्लामिक रिभोलुसनरी गार्ड कोर्प्स (आईआरजीसी) का प्रवक्ता तथा जनसम्पर्क अधिकारी अली मोहम्मद नैनी पनि मारिइसकेका छन्।

अमेरिका-इजरायलको आक्रमणबाट इरानमा अहिलेसम्म ३ हजारभन्दा बढी जनाको मृत्यु भइसकेको अमेरिकास्थित ह्युमन राइट्स एक्टिभिस्ट न्युज एजेन्सी (एचआरएएनए) ले जनाएको छ।