पाल्पा- तिनाउ खोलामा डुबेर बेपत्ता भएका दुई जना भारतीय युवकको शव फेला परेको छ । आइतबार दिउँसो करिब २ बजेतिर पाल्पाको तिनाउ गाउँपालिका– ३, ड्यामसाइडनजिकै तिनाउ खोलामा नुहाउने क्रममा भारतबाट घुम्न आएका ७ जनामध्ये २ जना युवक बेपत्ता भएका थिए ।

जिल्ला प्रहरी कार्यालय पाल्पाका सूचना अधिकारी प्रहरी नायब उपरीक्षक होमप्रकाश चौधरीका अनुसार सोमबार बिहान साढे १० बजेतिर डुबेको स्थानबाट करिब १०० मिटर तल भारतको उत्तर प्रदेश मेधावल ठाकुरद्वार पञ्चायत वडा नम्बर १८ सन्तकवीरनगरका १७ वर्षीय अमान अन्सारीको शव फेला परेको थियो ।

त्यस्तै, सोमबार दिउसो ४ बजेतिर डुबेको स्थानबाट करिब २०० मिटर तल १७ वर्षकै मोहम्मद फहरान अन्सारीको शव फेला परेको प्रहरीले जनाएको छ । ड्यामसाइड क्षेत्रमा हरेक वर्ष नुहाउने, पौडी खेल्ने र सेल्फी खिच्ने क्रममा मानिसहरू डुबेर ज्यान गुमाउँदै आएका छन् ।