काठमाडौं- चुनावी पराजयसँगै संकटमा परेको नेपाली कांग्रेसको १५ औँ नियमित महाधिवेशनको मिति तय गर्ने भएको छ।

मंगलबार दिउँसो बस्न लागेको कांग्रेस केन्द्रीय कार्यसमितिको बैठकले आगामी भदौमा १५ औँ नियमित महाधिवेशनको निर्णय गर्न सक्ने सम्भावना छ।

गत बुधबार सभापति पदबाट राजीनामा दिएका गगन थापाले मंगलबारको बैठकमा सहभागिता जनाउँदैछन् । उनको राजीनामालाई आइतबारको केन्द्रीय कार्यसमिति बैठकले अस्वीकृत गरिसकेको छ।

राजीनामा अस्वीकृत भएपछि थापा मंगलबार सभापतिका रुपमा केन्द्रीय कार्यसमिति बैठकमा मंगलबार सहभागी हुनेछन् । सभापति थापासमेत उपस्थित हुने मंगलबारको बैठकमा १५ औँ नियमित महाधिवेशनको कार्यतालिकाबारे छलफल गरिने भएको छ।

शुक्रबार र आइतबार दुई दिन उपसभापति विश्वप्रकाश शर्माले कांग्रेस बैठक चलाएका थिए । अब मंगलबार सभापति थापा उपस्थित भएर महाधिवेशनको कार्यतालिकाको छलफल अघि बढाउने भएका छन् ।

एकजना केन्द्रीय कार्यसमिति सदस्यले आगामी भदौमा नियमित महाधिवेशन गर्ने तालिका ल्याउन सक्ने बताउका छन् । उनका अनुसार क्रियाशील सदस्यताको सबै विवाद निरूपण गरेर तल्ला कमिटीको अधिवेशन बर्षा नलाग्दै सक्ने योजना छ ।

त्यसो हुँदा १५ औँ नियमित महाधिवेशनमा आगामी भदौ तेस्रो साता गर्ने तयारी भएको छ। भदौ तेस्रो साता कांग्रेसका संस्थापक बीपी कोइरालाको जन्मजयन्ती पर्छ। कांग्रेसले बीपीको जन्मजयन्तीको दिन भदौ २४ गते महाधिवेशन उद्घाटनको योजना बनाइरहेको छ।

कांग्रेसले यसअघि १५ औँ नियमित महाधिवेशनमा यसअघि गत पुसमा गर्ने निर्णय गरेको थियो । मंसिरमा भएको उक्त निर्णय कार्यान्वयन हुन नसक्दा कांग्रेसमा विवाद बढेको थियो ।

त्यहीकारण गत असोजमा बहुमत महाधिवेशन प्रतिनिधिले दिएको निवेदनका आधारमा पुस अन्तिम साता थापा पक्षले विशेष महाधिवेशन गरेको थियो ।

यो महाधिवेशनले कांग्रेसको एउटा तप्का पूरै बढारियो । तत्कालीन शेरबहादुर देउवा र नेता डा. शेखर कोइरालाहरू विशेष महाधिवेशनबाट पाखा लागे ।

तर कांग्रेसभित्रको विवाद र राष्ट्रिय स्वतन्त्र पार्टीको लहरकाबीच पुराना दलले फागुन २१ को चुनावमा नराम्रोसँग हार भोग्नुपर्‍यो । कांग्रेस सभापति गगन थापा र एमाले अध्यक्ष केपी शर्मा ओलीसमेत पराजित भए ।

यो अवस्थामा अहिले कांग्रेसको देउवा पक्ष फेरि जुर्मुराउन थालेको छ । देउवा पक्षले दबाब बढाएर नियमित महाधिवेशन नै गर्ने तयारीमा लागिरहँदा संस्थापन पक्ष नै महाधिवेशन मिति घोषणा गर्ने पक्षमा पुगेको हो ।