काठमाडौं – काठमाडौंको कोटेश्वरस्थित भाटभटेनी नजिक सोमबार भएको सवारी दुर्घटनामा पाँच जना घाइते भएका छन् ।

प्रहरीका अनुसार सातदोबाटोबाट कोटेश्वरतर्फ आउँदै गरेको बा. १४ च ४८२० नम्बरको कारले विपरीत दिशातर्फ गइरहेका चार वटा मोटरसाइकललाई ठक्कर दिएको हो । दुर्घटनापछि घटनास्थलमा केहीबेर सवारी आवागमन प्रभावित भएको थियो ।

दुर्घटनामा घाइते भएका पाँच जनालाई उपचारका लागि ललितपुरको ग्वार्कोस्थित बिएण्डबी अस्पताल पठाइएको उपत्यका ट्राफिक प्रहरी कार्यालयका एसपी नरेश सुवेदीले जानकारी दिए ।

प्रहरीका अनुसार घाइतेमध्ये एक जनाको अवस्था गम्भीर रहेको छ भने अन्यको उपचार भइरहेको छ। दुर्घटनामा संलग्न कार चालक विराटनगर स्थायी घर भई हाल सिनामंगल बस्दै आएका ४५ वर्षीय भीष्म श्रेष्ठलाई प्रहरीले नियन्त्रणमा लिएको छ । घटनाबारे थप अनुसन्धान भइरहेको प्रहरीले जनाएको छ।