काठमाडौं– राष्ट्रिय स्वतन्त्र पार्टीको पहिलो महाधिवेशन कार्यतालिका प्रभावित भएपछि लम्बिन सक्ने अनुमान गरिएको छ।

पार्टीका प्रवक्ता मनिष झाका अनुसार महाधिवेशनको पूर्वनिर्धारित कार्यतालिका प्रभावित भएको छ, जसका कारण कार्यक्रम ढिला हुन सक्ने देखिएको हो।

महाधिवेशनमा इलेक्ट्रोनिक भोटिङ प्रणाली प्रयोग गर्ने तयारी गरिएको छ। सो जिम्मेवारी राम लक्ष्मण समूहलाई दिइएको जनाइएको छ। तर हालसम्म प्रतिनिधिहरूको नामावली पूर्ण रूपमा नबुझाइएकाले मतदान र अन्य प्रक्रियामा ढिलाइ हुन सक्ने स्रोतहरूले बताएका छन्।

बिहान ८:३० बजेबाट सुरु हुने भनिएको बन्दसत्र अहिलेसम्म सुरु हुन सकेको छैन।

यसैबीच बन्दसत्रमा प्रस्तुत हुने प्रतिवेदनलाई अन्तिम रूप दिन पार्टी नेतृत्वबीच छलफल जारी छ। पार्टी सभापति रवि लामिछाने र वरिष्ठ नेता बालेन शाह बीच करिब पाँच घण्टादेखि छलफल भइरहेको छ।

दुवै नेताले बन्दसत्रमा प्रस्तुत हुने प्रतिवेदन र अन्य एजेन्डा टुंग्याउने प्रयास गरिरहेका छन्। छलफल लम्बिएपछि महाधिवेशनको समग्र कार्यक्रम प्रभावित भएको बताइएको छ।

राष्ट्रिय स्वतन्त्र पार्टीको पहिलो महाधिवेशन अहिले अनिश्चित ढिलाइतर्फ गएको देखिएको छ।