काठमाडौं– नेपाली कांग्रेसका नेता एवं पूर्वमन्त्री राजेन्द्र खरेलको निधन भएको छ ।  

खरेलको आइतबार राति उपचारका क्रममा पुरानो बानेश्वरस्थित फ्रन्टलाइन अस्पतालमा निधन भएको हो । उनी दम रोगबाट पीडित थिए । 

यसैबीच दिवंगत खरेलको पार्थिक शरिरलाई सोमबार दिउँसो कांग्रेस पार्टी कार्यालय सानेपामा राखिएको थियो भने कांग्रेस सभापति गगन कुमार थापाले पार्टीको झण्डा ओढाएर सम्मानपूर्वक श्रद्धाञ्जली अर्पण गरेका थिए । 

साथै अन्य कांग्रेसका नेता, कार्यकर्ता तथा शुभेच्छुकहरूले स्वर्गीय खरेललाई अन्तिम श्रद्धाञ्जली दिएका छन् ।

वसं २००३ मा काभ्रेपलाञ्चोक जिल्लाको खरेलथोकमा जन्मिएका खरेल लामो समयदेखि कांग्रेसको राजनीतिमा सक्रिय थिए। 

विसं २०५६ को आम निर्वाचनमा काभ्रेपलाञ्चोकबाट सांसद निर्वाचित भएका खरेलले शिक्षा मन्त्रालयको राज्यमन्त्री र महिला, बालबालिका तथा समाज कल्याण मन्त्रीका रुपमा समेत कार्यभार सम्हालिसकेका थिए  ।  उनका तीन छोरा र छोरी छन् ।