न्युयोर्क – कराँते खेलाडी सन्तोष राईलाई अमेरिकाको न्युयोर्कमा विशेष सम्मान गरिएको छ ।

किरात राई सोसाइटी अफ अमेरिकाले साकेला उँधौलीको अवसरमा आयोजना गरेको कार्यक्रममा राईलाई नगद ३ लाख रुपैयाँसहित सम्मानपत्र प्रदान गरिएको हो । न्युयोर्कका लागि नेपाली महावाणिज्यदूत दधिराम भण्डारीले उनलाई सम्मानपत्र र नगद हस्तान्तरण गरे।

कार्यक्रममा बोल्दै भण्डारीले खेलाडीहरू देशका गहना भएको उल्लेख गर्दै विदेशमा गएर उत्कृष्ट प्रदर्शन गरेकोमा राईलाई बधाई दिए । आयोजकका तर्फबाट भारती राईले पनि खेलाडीको उपलब्धिले समुदाय र देश दुवैको गौरव बढाएको बताउँदै आगामी प्रतियोगितामा अझ राम्रो प्रदर्शनको अपेक्षा व्यक्त गरे।

राईले हालै अमेरिकाको डल्लासमा आयोजित २७ औँ हिराल्डोज काइ सोतोकान अन्तर्राष्ट्रिय च्याम्पियनसिप–२०२६ मा दुई पदक जितेका थिए । उनले कातातर्फ स्वर्ण र कुमिते (फाइट)तर्फ रजत पदक जितेका हुन् । प्रतियोगितामा अमेरिकाका चाल्र्स जार्डन र नाथानिया जेआरलाई पछि पार्दै उनले उत्कृष्ट प्रदर्शन गरेका थिए ।

विश्वस्तरीय मानिने उक्त प्रतियोगितामा विभिन्न देशका शीर्ष कराँते खेलाडीहरूको सहभागिता रहने गर्छ । यस वर्ष नेपालको तर्फबाट खोटाङको दिक्तेल रूपाकोट मझुवागढी नगरपालिका–३ बाम्म्राङका राईले सहभागिता जनाएका थिए ।

सन्तोष राई लामो समयदेखि कराँते प्रशिक्षण र खेलाडी उत्पादनमा सक्रिय छन् । उनी काठमाडौँको इँचङ्गुमा डोजो सञ्चालन गर्दै आएका छन्, जहाँबाट उनले दर्जनौँ राष्ट्रिय स्तरका खेलाडी तयार गरिसकेका छन् ।

यसअघि उनले सन् २०२१ मा आयोजित नवौँ राष्ट्रिय खेलकुद प्रतियोगितामा कराँतेतर्फ स्वर्ण पदक जितेका थिए । मलेसिया र बेलायतमा भएका अन्तर्राष्ट्रिय प्रतियोगितामा उनले रजत र कास्य पदक पनि जितिसकेका छन् ।