काठमाडौँ– नेपाल धितोपत्र बोर्डले व्यवसायी दिपक भट्टले गरेको धितोपत्र कारोबारमा गम्भीर अनियमितता भएको निष्कर्ष निकाल्दै प्रारम्भिक जाँचबुझ प्रतिवेदन तयार पारेको छ । सम्पत्ति शुद्धीकरण अनुसन्धान विभागको पत्राचारपछि अनुसन्धान भएको हो । बोर्डले भट्टले धितोपत्र ऐनविपरीत कृत्रिम कारोबार गरी बजार प्रभावित पारेको प्रतिवेदनमा उल्लेख गरेको छ ।

प्रतिवेदनमा भट्टले वास्तविक लेनदेनविना नै उधारोमा सेयर कारोबार गरी कृत्रिम रूपमा मूल्य वृद्धि गराएको बोर्डको ठहर छ ।

भट्टले आफू र आफ्नो परिवारको स्वामित्व रहेका हिमालयन रिइन्स्योरेन्स, गार्डियन माइक्रो लाइफ, र नेपाल माइक्रो इन्स्योरेन्सजस्ता कम्पनीबीच आपसमा सेयर खरिद–बिक्री गरी मूल्यमा उतारचढाव ल्याएको प्रतिवेदनमा उल्लेख छ ।

प्रतिवेदनमा बोर्डले दिपक भट्टलाई मुख्य आरोपित बनाएको छ । शुभी अग्रवाल, ऋषिराज मोर र राजबहादुर शाहलाई पनि मतियारका रूपमा प्रतिवेदनमा समेटेको छ ।

यस्तै, हिमालयन रिइन्स्योरेन्स लगायतका संस्था र व्यवसायी शेखर गोल्छा तथा रोहित गुप्तालाई पनि यो कसुरमा सहयोग गरेको आरोप लगाइएको छ ।धितोपत्र बोर्डले यस प्रकरणमा धितोपत्र सम्बन्धी ऐन, २०६३ को दफा ९४, ९५ र ९६ बमोजिमको कसुर भएको भन्दै थप अनुसन्धान र कारबाहीको प्रक्रिया अघि बढाउन सिफारिस गरेको छ ।